محکمہ موسمیات نے پہاڑی علاقوں میں بارش اور برفباری کی پیشنگوئی کردی

محکمہ موسمیات کے مطابق ملک کے بیشتر علاقوں میں موسم خشک رہنے کی توقع ہے جبکہ پہاڑی علاقوں میں بارش اور برفباری کا امکان ہے۔

ٓتفصیلات کے مطابق ملک کے بیشتر علاقوں میں موسم خشک رہے گا تاہم گلگت بلتستان، چترال اور اس کے گرد و نواح میں بارش اور پہاڑوں پر ہلکی برفباری کی پیشگوئی ہے۔

اس کے علاوہ پنجاب کے بیشتر اضلاع میں اسموگ چھائے رہنے کی توقع ہے، خصوصاً صبح اور رات کے اوقات میں پنجاب کے کچھ میدانی علاقوں میں دُھند پڑنے کا امکان ہے۔

مزید پڑھیں: نومبر میں موسم خشک اور بارشیں معمول سے کم ہونے کی پیشنگوئی

پنجاب کے بیشتر علاقوں میں موسم خشک رہنے کا امکان ہے تاہم سیالکوٹ، نارووال، گوجرانوالہ، لاہور، قصور، اوکاڑہ، سرگودھا، جھنگ، رحیم یار خان، ڈی جی خان اور ان کے گرد و نواح میں اسموگ کا امکان ہے۔

سندھ اور خیبرپختونخوا کے بیشتر اضلاع میں بھی موسم خشک رہنے کی توقع ہے تاہم چترال اور اس کے اطراف میں جزوی طور پر ابر آلود موسم کے ساتھ ہلکی بارش اور بلند پہاڑوں پر برفباری ہو سکتی ہے۔

اسلام آباد اور اس کے گرد و نواح میں موسم خشک رہنے کا امکان ہے۔ بلوچستان کے بیشتر اضلاع میں بھی موسم خشک رہے گا، تاہم شمالی اضلاع میں رات کے اوقات میں سردی کی شدت میں اضافہ ہو سکتا ہے۔

کشمیر میں موسم خشک اور سرد رہنے کی توقع ہےجبکہ گلگت بلتستان میں جزوی طور پر ابر آلود موسم کے ساتھ ہلکی بارش اور برفباری ہونے کی پیشگوئی کی گئی ہے۔

کراچی میں آئندہ 24 گھنٹوں کے دوران موسم گرم اور مرطوب رہنے کا امکان ہے۔ محکمہ موسمیات کے مطابق کراچی میں کم سے کم درجہ حرارت 22.8 ڈگری سینٹی گریڈ ریکارڈ ہوا ہے، جبکہ زیادہ سے زیادہ درجہ حرارت 34

سے 36 ڈگری سینٹی گریڈ کے درمیان رہنے کی توقع ہے۔ شہر میں مغرب کی سمت سے ہلکی ہوائیں چل رہی ہیں اور ہوا میں نمی کا تناسب 80 فیصد ریکارڈ کیا گیا ہے۔