کوئٹہ دھماکے شہداء کی نماز جنازہ میں آرمی چیف کی شرکت

کوئٹہ ریلوے سٹیشن پر خودکش حملے کے شہدا کی نماز جنازہ کوئٹہ گیریژن میں ادا کر دی گئی۔

شہدا کی نماز جنازہ میں آرمی چیف جنرل سید عاصم منیرسمیت وزیرداخلہ محسن نقوی، گورنر، وزیراعلیٰ بلوچستان اور صوبائی وزرا نے شرکت کی۔

نماز جنازہ میں بڑی تعداد میں فوجی اور سول حکام بھی شریک ہوئے، آرمی چیف نے سی ایم ایچ کوئٹہ میں زخمیوں کی عیادت بھی کی، جنرل سید عاصم منیر نے دہشت گردی کے خاتمے کیلئے قومی عزم کا اعادہ کیا۔

آرمی چیف جنرل سید عاصم منیر نے کہا کہدہشت گردی کو کسی صورت برداشت نہیں کیا جائے گا، دہشت گردی کے خاتمے کا مشن مشترکہ عزم کے ساتھ جاری رکھا جائے گا۔جنرل سید عاصم منیر نے کہا کہ دہشت گردی کیخلاف جنگ کیلئے تمام پاکستانیوں کی پختہ حمایت درکار ہے۔

آرمی چیف نے اس بات پر زور دیا کہ اجتماعی کوششوں اور قومی عزم کے ساتھ اس مشن کو مکمل کریں گے،آرمی چیف نے اس بات کی اہمیت پر زور دیا کہ دہشتگردی کے خلاف حمایت میں تمام پاکستانیوں سول اور عسکری اداروں کو اجتماعی کوشش کرنا ہوگی۔

ملٹری اور سول اداروں کی اجتماعی کوششوں سے ملک کو امن اور خوشحالی کی طرف گامزن کیا جائے گا،اس سے قبل کوئٹہ آمد پر کمانڈر بلوچستان کور نے آرمی چیف جنرل سید عاصم منیر کا استقبال کیا۔