حدِ نگاہ صفر ہونے پر موٹروے کو کئی مقامات سے بند کر دیا گیا

شدید سموگ اور دھند کا راج، پنجاب کے مختلف شہروں میں موٹروے کو بند کر دیا گیا۔

تفصیلات کے مطابق پنجاب کے مختلف شہروں بشمول ملتان، بہاولپور اور راجن پور میں شدید اسموگ اور دھند کے باعث حد نگاہ میں کمی ہو گئی ہے، جس کے نتیجے میں موٹرویز کو ہر قسم کی ٹریفک کے لیے بند کر دیا گیا ہے۔

موٹر وے ایم 2 لاہور سے بھیرہ تک، موٹر وے ایم 3 لاہور سے درخانہ تک اور موٹر وے ایم 4 ملتان سے پنڈی بھٹیاں تک بند کر دی گئی ہیں۔ اس کے علاوہ، موٹر وے ایم 5 ملتان سے سکھر تک اور لاہور سیالکوٹ موٹروے بھی ٹریفک کے لیے بند کر دی گئی ہے۔

مزید پڑھیں: سوموار کے روز ملک کے مختلف علاقوں میں بارش کی پیشنگوئی

ترجمان موٹر ویز پولیس کے مطابق یہ اقدام اسموگ اور شدید دھند کی وجہ سے کیا گیا ہے تاکہ حادثات سے بچا جاسکے۔ پنجاب سے اسموگ کا دائرہ اب خیبر پختونخوا تک پھیل چکا ہے اور آج رات ملتان پاکستان کے سب سے زیادہ آلودہ شہر کے طور پر سامنے آیا، جس کے بعد لاہور اور پشاور کا نمبر رہا۔

شدید دھند اور اسموگ کی وجہ سے ملتان کا فلائٹ آپریشن بھی شدید متاثر ہوا ہے اور حد نظر کی کمی کے باعث چھ پروازیں منسوخ کر دی گئیں۔ ایوی ایشن ذرائع کے مطابق اسموگ اور انتظامی مسائل کی وجہ سے ملک بھر کی 34 پروازیں تاخیر کا شکار ہوئیں۔ مسقط سے ملتان آنے والی پرواز کو اسلام آباد میں اتارا گیا، اور جدہ سے ملتان پہنچنے والی نجی ایئر لائن کی پرواز لاہور میں لینڈ کرائی گئی۔

اسی طرح، مسقط سے لاہور، سیالکوٹ اور دبئی سے لاہور کی پروازوں کو دیگر شہروں میں لینڈ کرایا گیا، جبکہ ملتان سے کراچی جانے والی 2 ملکی پروازیں اور جدہ سے ملتان کی 2 غیر ملکی پروازیں منسوخ کر دی گئیں۔ اس کے علاوہ، لاہور سے کوالالمپور، دبئی، استنبول، جدہ، مدینہ، اور العین سے اسلام آباد جانے والی پروازوں میں تاخیر ہوئی اور جدہ، اسلام آباد، ریاض، استنبول اور بحرین کی پروازوں میں بھی تاخیر کا سامنا رہا۔

شارجہ اور استنبول سے کراچی جانے والی پروازوں کی آمد میں بھی تاخیر ہوئی، جبکہ کراچی سے لاہور کے لیے پی آئی اے کی پرواز 4 گھنٹے کی تاخیر سے روانہ ہو سکی۔