وزیراعظم کے مشیر برائے سیاسی امور رانا ثناء اللہ خان نے کہا ہے کہ موجودہ حکومت اپنی مدت پوری کرے گی اور آئندہ انتخابات مقررہ وقت پر ہوں گے۔
رانا ثنا اللہ کا کہنا تھا کہ سیاسی جماعتوں کو ایک دوسرے کے ساتھ بات چیت کرنی چاہیے تاکہ شفاف اور پرامن انتخابی عمل ممکن ہو سکے۔ انہوں نے کہا کہ 190 ملین پاؤنڈ کے کیس کو سیاسی مسئلہ نہیں بنایا جانا چاہیے اور اس معاملے میں کوئی پیشگوئی نہیں کی جا سکتی۔
انہوں نے کہا کہ حکومت کسی بھی صورت میں ریاستی اداروں کی اجارہ داری کی خلاف ورزی کرنے والی وائلنس کو روکنے کے لیے تیار ہے۔ ریاست کی اجارہ داری وائلنس پر قابو پانے کے لیے ضروری ہے اور اس کے لیے ایجنسیز موجود ہیں۔
انہوں نے کہا کہ کفن باندھ کر میدان میں آنا اور اپنی موت کی پیش گوئی کرنا سیاسی جدوجہد کا حصہ نہیں ہے۔ ان کا کہنا تھا کہ پی ٹی آئی کو پرامن طریقے سے سیاسی عمل میں حصہ لینا چاہیے اور حکومت ان کے ساتھ بات چیت کے لیے تیار ہے۔
وفاقی مشیر نے مزید کہا کہ وزیراعظم نے پی ٹی آئی کے ساتھ غیر مشروط بات چیت کی پیشکش کی تھی تاہم پی ٹی آئی نے اس پیشکش کو مسترد کرتے ہوئے اسٹیبلشمنٹ سے بات کرنے کا کہا۔ جبکہ اسٹیبلشمنٹ نے واضح طور پر کہا تھا کہ اگر گفتگو کرنی ہے تو سیاسی جماعتوں سے کریں ہمارے ساتھ گفتگو کرنے کا کوئی جواز نہیں بنتا۔۔
انہوں نے 9 مئی کے واقعات پر بھی بات کی اور کہا کہ اسٹیبلشمنٹ پی ٹی آئی کے خلاف مدعی ہے۔ اگر پی ٹی آئی کو اسٹیبلشمنٹ سے بات کرنی ہے تو انہیں 9 مئی کے واقعات پر معافی مانگنی چاہیے اور اس پر افسوس کا اظہار کرنا ہوگا۔ رانا ثناء اللہ نے کہا کہ حکومت تمام سیاسی جماعتوں کے ساتھ بات چیت کے لیے تیار ہے اور یہ بات چیت پارلیمنٹ کے ذریعے ہونی چاہیے تاکہ ملک میں سیاسی استحکام اور امن قائم رہ سکے۔
By 
