چیئرمین جوائنٹ چیفس کی قطر کے نائب وزیراعظم سے ملاقات، دفاعی امورمیں تعاون کا اعادہ

دوحہ: چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے دورہ قطرکے دوران نائب وزیراعظم و وزیردفاع شیخ سعود بن عبدالرحمان اور مسلح افواج کے سربراہ سے الگ الگ ملاقاتیں کیں۔

ملاقات میں خطے کی صورتحال اور پاک قطر دو طرفہ تعلقات کے فروغ پر بات چیت کی گئی

پاک فوج کے تعلقات عامہ کے مطابق چیئرمین جوائنٹ چیفس آف اسٹاف کمیٹی نے دونوں ممالک کے درمیان مضبوط برادرانہ تعلقات کو اْجاگر کرتے ہوئے عسکری تعاون کو فروغ اور سلامتی کے شعبوں میں مزید بہتری دینے کے عزم کا اعادہ کیا

چیئرمین جے سی ایس سی نے پاکستان اور قطر کے درمیان مضبوط برادرانہ تعلقات پر روشنی ڈالی اور کہا کہ دفاع شعبے میں ملٹری ٹو ملٹری تعاون کو مزید مستحکم کرنے کیلئے پرعزم ہیں۔
ائی ایس پی آر کے مطابق قطری قیادت نے علاقائی استحکام کو یقینی بنانے میں پاکستان کے مثبت کردار کا اعتراف کیا۔ قطری حکام نے دہشت گردی کے خلاف جنگ میں پاکستان کی مسلح افواج کی پیشہ وارانہ مہارت اور قربانیوں کو سراہا۔ قطر کی مسلح افواج کے چاق و چوبند فوجی دستے نے چیئرمین جے سی ایس سی کو گارڈ آف آنر پیش کیا۔