انسٹا گرام میں اے آئی پروفائل فوٹو تیار کرنیوالا فیچر متعارف کروائے جانے کا امکان

میٹا کی جانب سے حالیہ مہینوں میں اپنے سوشل میڈیا پلیٹ فارمز میں آرٹی فیشل انٹیلی جنس (اے آئی) فیچرز کو شامل کرنے کے لیے تیاریاں جاری ہیں۔

اب ایک نئی رپورٹ میں بتایا گیا کہ انسٹا گرام میں ایک نیا فیچر متعارف کرایا جا رہا ہے جس سے صارفین اپنی پروفائل فوٹو اے آئی ٹیکنالوجی کی مدد سے تیار کرسکیں گے۔

ایک ڈویلپر Alessandro Paluzzi نے اس نئے فیچر کے بارے میں بتایا ،اس فیچر کو Create an AI profile picture کا نام دیا گیا ہے اور ڈویلپر کی جانب سے ایکس (ٹوئٹر) پر اس کا اسکرین شاٹ بھی شیئر کیا گیا۔

یہ بھی پڑھیں :ویزا ایمنسٹی سکیم سے فائدہ اٹھالیں ، دبئی امیگریشن نے غیر قانونی تارکین وطن کو خبردار کردیا

انہوں نے بتایا کہ انسٹا گرام کی جانب سے اے آئی پروفائل پکچر کی تیاری میں مدد فراہم کرنے والے فیچر پر کام کیا جار ہا ہے، اس بارے میں زیادہ تفصیلات تو موجود نہیں مگر ممکنہ طور پر یہ فیچر میٹا کے لاما اے آئی ماڈل پر مبنی ہوگا۔

ابھی انسٹا گرام میں صارفین ڈیوائس سے کسی تصویر کو اپ لوڈ کرکے پروفائل فوٹو کے طور پر استعمال کرتے ہیں ، مگر اس نئے اے آئی فیچر سے صارفین کو زیادہ تفصیلی اور تخلیقی پروفائل فوٹو تیار کرنے میں مدد ملے گی۔

واضح رہے کہ ابھی کمپنی کی جانب سے اس فیچر کی تردید یا تصدیق نہیں کی گئی تو یہ کہنا مشکل ہے کہ اسے کب تک متعارف کرایا جاسکتا ہے۔