وزیر اعلی خیبر پختونخوا علی امین گنڈاپور کاکہنا ہے کہ شہری سب ہمارے ہیں اور ان کی شکایات کا ازالہ حکومت کی ذمہ داری ہے، عوامی شکایات پورٹل کو مزید فعال اور مؤثر بنایا جائے گا۔
وزیر اعلی خیبر پختونخوا کی زیر صدارت اہم اجلاس ہوا، وزیراعلی کے شکایات پورٹل (اختیار عوام کا) پر عوامی شکایات کے ازالے کی صورتحال کا جائزہ لیا گیا، متعلقہ حکام کی جانب سے وزیر اعلی کو شکایات کے آزالے پر اب تک کی پیشرفت پر بریفنگ دی گئی۔
بریفنگ میں بتایا گیا کہ پورٹل پر اب تک 6242 شکایات درج ہوچکی ہیں، ان شکایات میں سے 2559 عوامی شکایات کا ازالہ کیا جاچکا ہے، 3683 عوامی شکایات کے ازالے پر کام جاری ہے، اب تک 1200 شہریوں کو پورٹل کے ذریعے ریلیف فراہم کیا گیا ہے، 757 شہریوں کو جزوی ریلیف فراہم کیا گیا ہے، تقریبا 300 خواتین بھی اس پورٹل کا باقاعدگی سے استعمال کر رہی ہیں۔
بریفنگ میں بتایا گیا کہ پورٹل پر ضلع پشاور سے سب سے زیادہ شکایات درج ہوئی ہیں جن کی تعداد 1458 ہے ، ضلع مردان سے 405، بنوں سے 363، ڈیرہ اسماعیل خان سے 335 جبکہ ایبٹ آباد سے 344 شکایات موصول ہوئی ہیں ، اسی طرح ضلع مانسہرہ سے 277، چارسدہ سے 237، ہری پور سے 235، صوابی سے 223 جبکہ لوئر دیر سے 185 شکایات درج ہوئی ہیں۔
بریفنگ میں بتایا گیا کہ پورٹل پر میونسپل سروسز سے متعلق 1966 شکایات موصول ہوئی ہیں ، تعلیم کے شعبے سے متعلق 1040، عوامی ایجنڈے پر عملدرآمد سے متعلق 876، بدعنوانی سے متعلق 602 جبکہ امن و امان سے متعلق 539 شکایات موصول ہوئی ہیں، عوام اختیار کا پورٹل کے تحت عوامی شکایات کے ازالے کے لئے 3 سے 7 دن کا وقت مقرر ہے۔
وزیر اعلیٰ کو گزشتہ حکومت کے خپل وزیراعلیٰ کمپلینٹ سیل کے تحت عوامی شکایات کے ازالے پر بھی بریفنگ دی گئی، اس سال اب تک خپل وزیر اعلی کمپلینٹ سیل پر 1165 شکایات موصول ہوئے ہیں، ان شکایات میں سے 1047 شکایات کا ازالہ کیا گیا ہے باقی 118 کے ازالے پر کام جاری ہے ، وزیر اعلیٰ نے ہدایت کی کہ عوام کی سہولت کے لئے خپل وزیر اعلی کمپلینٹ سیل کے تحت شکایات کو بھی عوام اختیار پورٹل پر منتقل کیا جائے، عوامی شکایات چاہیے جس کسی بھی دور میں موصول ہوئے ہو ان کا ازالہ ہونا چاہیے۔
علی امین گنڈاپور نے کہا کہ شہری سب ہمارے ہیں اور ان کی شکایات کا ازالہ حکومت کی ذمہ داری ہے، اس میں کوئی تفریق نہیں ہونی چاہیے، عوامی شکایات کا ازالہ شکایات کنندگان کے لئے مکمل طور پر تسلی بخش ہونا چاہیے، شکایات کنندگان کو ٹرخانے کی کوشش کرنے والوں کے خلاف سخت کارروائی کی جائے گی۔
ان کاکہنا تھا کہ عوامی شکایات کے ازالے میں کوتاہی یا تاخیر کرنے والے حکام اب سزا کے لئے تیار ہوجائیں، عوامی شکایات پورٹل کو مزید فعال اور موثر بنایا جائے گا، عوام سے اپیل ہے کہ وہ اس پورٹل کا زیادہ سے زیادہ استعمال کریں، عوامی شکایات کے ازالے کے کام کی خود نگرانی کر رہا ہوں شہریوں کے جائز شکایات کا ازالہ ہر صورت کیا جائے گا، پورٹل پر بیرون ملک مقیم شہریوں کے شکایات کے اندراج اور ان کے ازالے کا خصوصی اہتمام کیا جائے۔
By 
