لاہور ہائیکورٹ نے عمران خان کیخلاف درج تمام مقدمات میں عبوری ضمانت دینے کی استدعا مسترد کردی

لاہور ہائیکورٹ نے عمران خان کے خلاف درج تمام مقدمات میں عبوری ضمانت دینے کی استدعا مسترد کر دی۔

لاہور ہائیکورٹ کے جسٹس فاروق حیدر نے عمران خان کی ہمشیرہ نورین نیازی کی درخواست پر فیصلہ سنایا۔ نورین نیازی نے عمران خان کے خلاف درج مقدمات کی تفصیلات کے لیے درخواست دائر کی تھی اور تمام مقدمات میں عبوری ضمانت دینے کی استدعا بھی کی گئی تھی۔

مزید پڑھیں: عمران خان کے خلاف مقدمہ سول یا ملٹری کورٹ میں چلنے کا فیصلہ جلد ہو جائیگا، وزیر دفاع خواجہ آصف

محکمہ داخلہ پنجاب اور وفاقی حکومت کی جانب سے عمران خان پر درج مقدمات کی رپورٹس عدالت میں پیش کی گئیں۔ محکمہ داخلہ پنجاب نے بتایا کہ عمران خان کے خلاف صوبے میں کوئی مقدمہ درج نہیں کیا گیا جبکہ وفاقی حکومت کے وکیل نے بتایا کہ اسلام آباد پولیس نے ان کے خلاف 62 کیسز درج کر رکھے ہیں۔

وکیل پنجاب حکومت نے بھی آگاہ کیا کہ صوبے میں 54 مقدمات درج ہیں۔ مقدمات کی تفصیل سامنے آنے پر وکیل درخواستگزار نے استدعا کی کہ بانی پی ٹی آئی کو تمام مقدمات میں عبوری ضمانت فراہم کی جائےتاہم جسٹس فاروق حیدر نے استدعا کو مسترد کرتے ہوئے کہا کہ میرا نقطہ نظر یہ نہیں ہے، میرے نزدیک ملزم کا ضمانت قبل از گرفتاری میں عدالت کے روبرو پیش ہونا ضروری ہے۔ بعد ازاں عدالت نے درخواست نمٹا دی۔