آئی سی سی چیمپئنز ٹرافی 2025 کے حوالے سے معاملہ ابھی تک ڈیڈ لاک کا شکار ہے، تاہم اس پر آج اہم پیشرفت متوقع ہے۔
نجی ٹی وی ذرائع کے مطابق بھارتی کرکٹ بورڈ کے سیکریٹری جے شاہ آج دبئی پہنچ رہے ہیں، جہاں ان کی آئی سی سی کے آفیشلز سے ملاقات متوقع ہے۔ ذرائع کا کہنا ہے کہ اس ملاقات میں چیمپئنز ٹرافی کے حوالے سے اہم پیشرفت ہو سکتی ہے، اور اس ملاقات کے بعد آئی سی سی کے چیئرمین کا پاکستان کرکٹ بورڈ کے چیئرمین محسن نقوی سے فون پر رابطہ بھی متوقع ہے۔
آئی سی سی چیمپئنز ٹرافی 19 فروری سے 9 مارچ تک پاکستان میں شیڈول ہے، جہاں پاکستان میگا ایونٹ کا میزبان ہونے کے ساتھ ساتھ دفاعی چیمپئن بھی ہے۔ تاہم بھارت نے ایک بار پھر پاکستان آنے سے انکار کرتے ہوئے ٹورنامنٹ کے ہائبرڈ ماڈل کے تحت کھیلنے کی خواہش ظاہر کی ہے۔
پی سی بی نے آئی سی سی کو اس معاملے پر خط لکھا ہے جس میں ہائبرڈ ماڈل کو مسترد کرتے ہوئے چیمپئنز ٹرافی مکمل طور پر پاکستان میں کرانے کا دوٹوک اعلان کیا ہے۔ پی سی بی نے یہ بھی واضح کیا ہے کہ اگر بھارت چیمپئنز ٹرافی کھیلنے پاکستان نہیں آیا تو پاکستان آئندہ بھارت کے ساتھ کسی بھی فورم پر نہیں کھیلے گا۔
ڈیڈ لاک کے باوجود، چیمپئنز ٹرافی کے انعقاد میں تین ماہ سے بھی کم وقت رہ گیا ہے، لیکن آئی سی سی نے ابھی تک ٹورنامنٹ کے باضابطہ شیڈول کا اعلان نہیں کیا۔ اس پر براڈکاسٹرز کا دباؤ بھی بڑھ رہا ہے۔ آئی سی سی 2027 تک کے میڈیا رائٹس فروخت کر چکا ہے اور معاہدے میں ہر ایونٹ میں ایک پاک بھارت میچ کرانے کی شرط بھی شامل ہے۔ اس ڈیڈ لاک کے نتیجے میں اگر پاک بھارت میچ متاثر ہوا، تو آئی سی سی کو قانونی چارہ جوئی کا سامنا بھی ہو سکتا ہے۔
By 
