مسلم لیگ ن سے ہمارا اتحاد محبت کا نہیں مجبوری کا ہے : گورنر پنجاب

گورنر پنجاب سردار سلیم حیدر خان کا کہنا ہے کہ پاکستان مسلم لیگ ن (پی ایم ایل این )سے ہمارا اتحاد محبت نہیں مجبوری ہے۔

تفصیلات کے مطابق نیشنل ڈیفنس یونیورسٹی اسلام آباد کے زیراہتمام 26 ویں نیشنل سکیورٹی ورکشاپ کے شرکاء سے خطاب کے دوران سردار سلیم حید ر کا کہنا تھا کہ گورنر کا عہدہ آئینی ہے، اصو ل تو یہ بنتا ہے کہ وزیراعلیٰ کو گورنر کے پاس آنا چاہیے مگر اس کے باوجود میں خود چیف منسٹر سے ملنے گیا۔

انہوں نے اس بات کو باور کروایا کہ بطور اتحادی میری جانب سے آپ کو کوئی گلہ شکوہ نہیں ہو گا ، ان کا کہنا تھا کہ ہم صرف یہ چاہتے ہیں چیزیں میرٹ پر ہوں اور بطور اتحادی پارٹیاںہمیں مشاورت کرنی چاہیے ، 6 ماہ ہو گئے ہیں لیکن آج تک وزیراعلیٰ نے فون کیا اور نہ ہی کبھی مجھ سے مشاورت کی گئی ۔

سردار سلیم حیدر کا کہنا تھا کہ فون پر میں نےکئی بار رابطہ کرنے کی کوشش کی مگر صفررسپانس آیا ، ڈیڈ لاک ہوا، میں اب ان کے پاس جانا مناسب نہیں سمجھتا، حکومت کے اتحادی ہونے کے باوجود ہم سے مشاورت نہیں کی جاتی، ہمارا (ن) لیگ سے اتحاد محبت کا نہیں مجبوری کا ہے جوپاکستان کی بقاء کیلئے ہے۔

ان کا کہنا تھا کہ اگر پاکستان پیپلز پارٹی مائنس ہو جائے تو وزارت عظمیٰ کا عہدہ قائم نہیں رہ سکتا ۔ ملک کی خاطر پھر بھی قربانیاں دیں گے ، اپنی اعلیٰ قیادت کو پنجاب کی صورت حال کے بارے آگاہ کیا ہوا ہے، 26ویں آئینی ترمیم منظور کروانے میں بلاول بھٹو زرداری نے اہم کردار ادا کیا۔

گورنر پنجاب کا کہنا تھا کہ ماضی میں نون لیگ کے ساتھ حکومت میں اتحاد کا تجربہ تلخ تھا، ہمیں توقع تھی ن لیگ نے ماضی سے سبق سیکھ لیا ہو گالیکن ایسا نہیں ہو سکا۔ تحریری معاہدے اور مشاورتی کمیٹیاں تشکیل دینے کے باوجود معاہدوں پر کوئی عملدرآمد نہیں ہوتا۔

ا ن کا مزید کہنا تھاکہ گورنر ہاؤس میں یونیورسٹی کے طلباء کیلئے ورکشاپ کے انعقاد کا پلان زیر غور ہے، یونیورسٹیوں میں تحقیق پر توجہ دینے کی اشد ضرورت ہے، ہمیشہ ہمارے خلاف یہ پروپیگنڈا کیا جاتا رہا کہ پیپلز پارٹی نے سندھ میں ڈلیور نہیں کیا، یہ سن کر خوشی ہوئی کہ سندھ کا ہائر ایجوکیشن کمیشن اچھا کام کر رہا ہے، سندھ میں صحت اور تعلیم کا نظام پنجاب سے بھی آگے ہے۔