وزیراعلی امین گنڈاپور نے مذاکرات عمران خان کی رہائی سے مشروط کردی

اسلام آباد: خیبرپختونخوا کے وزیراعلیٰ علی امین گنڈاپور نے کہا ہے کہ حکومت سے مذاکرات صرف اسی صورت میں ہوں گے جب بانی پاکستان تحریک انصاف (پی ٹی آئی) کو رہا کیا جائے گا۔

نجی ٹی وی چینل سے گفتگو کرتے ہوئے انہوں نے واضح کیا کہ پارٹی کے قائد جو بھی فیصلہ کریں گے، اس پر مکمل عملدرآمد ہوگا۔ علی امین گنڈاپور نے اعلان کیا کہ وہ اور پی ٹی آئی کے کارکن ہر صورت ڈی چوک پہنچیں گے اور بانی پی ٹی آئی سمیت تمام گرفتار رہنماؤں کی رہائی اور دیگر مطالبات کی منظوری تک اسلام آباد میں ہی قیام کریں گے۔

انہوں نے مزید کہا کہ ماضی کے احتجاج میں بھی تمام مشکلات کے باوجود اسلام آباد پہنچے تھے اور اس بار بھی راستے بند ہونے کے باوجود ہدف حاصل کریں گے۔وزیراعلیٰ کا کہنا تھا کہ پی ٹی آئی کا احتجاج پرامن ہوگا اور کسی قسم کی بدنظمی یا تشویش کا باعث نہیں بنے گا۔ انہوں نے کہا کہ پارٹی اپنے جائز مطالبات کے حق میں آئندہ بھی پرامن انداز میں آواز بلند کرتی رہے گی۔

علی امین گنڈاپور نے زور دیا کہ مذاکرات کا فیصلہ بانی پی ٹی آئی کے ہاتھ میں ہے اور وہ جو بھی حکم دیں گے، اس پر فوری عمل کیا جائے گا۔