پی ٹی آئی کے سینکڑوں کارکنان ملک بھر سے گرفتار, قافلہ اسلام آباد کی جانب گامزن

ملک بھر سے پاکستان تحریک انصاف کے سینکڑوں کارکنان کو گرفتار کیا گیا ہے جبکہ بانی چیئرمین عمران خان کے ہزاروں جان نثاروں نے اتوار کے روز وفاقی دارالحکومت کی جانب ’’فیصلہ کن‘‘ لانگ مارچ کا آغاز کیا، اور تمام رکاوٹیں عبور کرتے ہوئے پاکستان تحریکِ انصاف کا قافلہ پشاور سے اسلام آباد کی جانب گامزن ہے۔

پاکستان تحریک انصاف کے رہنمائوں کے قافلے خاص طور پر جن کی سربراہی خیبر پختونخوا کے وزیر اعلیٰ علی امین گنڈا پور  صوبائی صدر کی حیثیت سے کر رہے ہیں،اتوار کی رات دیر گئے اس رپورٹ کے فائل ہونے تک ڈی چوک کی جانب بڑھ رہے ہیں۔

پی ٹی آءی احتجاج مارچ کو ناکام بنانے کی کوشش میں، پولیس نے جڑواں شہروں راولپنڈی اور اسلام آباد سے پی ٹی آئی کے سینکڑوں حامیوں کو بھی گرفتار کر لیا جب کہ رہائشی بڑی تعداد میں سڑکوں پر نکل آئے اور بانی پی ٹی آئی عمران خان کی کال کی بھرپور حمایت کرتے ہوئے حکومت پر دباؤ ڈالا کہ وہ اپنے تین مطالبات منوائیں۔ پی ٹی آئی کے جلسے سے قبل اسلام آباد اور راولپنڈی کو سیل کر دیا گیا ہے۔

گنڈا پور کی سربراہی میں مرکزی قافلہ آخری اطلاعات تک اٹک کے مقام حضرو میں تھا، ، پولیس کی بھاری نفری کے باوجود قافلہ اسلام آباد کی طرف بڑھ رہا ہے۔ گنڈا پور کے قافلے میں ہزاروں مظاہرین ہیں جس سے حکمران حلقوں میں خوف و ہراس ہے جس کے نتیجے میں پولیس نے شدید شیلنگ، لاٹھی چارج، ربڑ کی گولی چلانا، پتھراؤ کرنا وغیرہ کا سہارا لیا لیکن مظاہرین ہچکچاتے رہے اور رکاوٹیں دور کرتے رہے۔

قافلے میں مظاہرین کی تعداد گزشتہ ماہ ہونے والے پچھلے مارچ سے تین گنا زیادہ ہے قبل ازیں وزیر داخلہ محسن نقوی نے قافلے کا فضائی جائزہ لیا جس کے بعد جڑواں شہروں کے ساتھ ساتھ ان علاقوں میں جہاں سے قافلے جا رہے تھے انٹرنیٹ سروس معطل کر دی گئی۔

ملک کے کچھ حصوں سے ٹیلی کام خدمات کی معطلی کی بھی اطلاع ہے۔ راولپنڈی کے علاقوں ڈھوک کالا خان، کھنہ پل اور فیض آباد میں پولیس اور پی ٹی آئی کے مظاہرین کے درمیان جھڑپوں میں درجنوں مظاہرین اور کچھ پولیس اہلکار زخمی ہو گئے، مظاہرین نے قانون نافذ کرنے والوں پر پتھراؤ کیا۔

دوسری جانب پنجاب کے تمام بڑے شہروں میں پی ٹی آئی ورکرز کے خلاف کریک ڈاؤن جاری ہے اور سینکڑوں ورکرز اور قیادت کو گرفتار کرنے کی اطلاعات ہیں۔ پولیس ذرائع کے مطابق تھانہ شاہ پورپولیس نے ریلی نکالنے پر پی ٹی آئی کے دوایم این اے اور دو ایم پی ایز سمیت 200سے زائد افراد کے خلاف مقدمہ درج کرکے 61 کارکنان کو گرفتار کرلیا ہے جبکہ دیگر رہنماؤں اور کارکنوں کی گرفتاری کے لیے چھاپے جاری ہیں۔

پی ٹی آئی رہنماؤں اور کارکنوں کے خلاف دفعہ 144کی خلاف ورزی سمیت تین مختلف دفعات کے تحت مقدمہ درج کیا گیا ہے۔