آئی سی سی چیمپئنز ٹرافی کے شیڈول کے حوالے سے ہونے والا اجلاس ایک بار پھر ملتوی کر دیا گیا۔
نجی ٹی وی کے ذرائع کے مطابق آج چیمپئنز ٹرافی سے متعلق کوئی میٹنگ شیڈول نہیں کی گئی، اور اس معاملے کو فائنل کرنے میں مزید وقت لگ سکتا ہے۔
ذرائع کا کہنا ہے کہ آئی سی سی اور اسٹیک ہولڈرز کے درمیان رابطے جاری ہیں، جب کہ پاکستان کرکٹ بورڈ (پی سی بی) اور بھارتی کرکٹ بورڈ کے درمیان بھی بات چیت کا سلسلہ برقرار ہے۔
مزید یہ کہ آئی سی سی چیمپئنز ٹرافی 2025 کے شیڈول کو فائنل کرنے کے لیے اگر ضرورت پڑی تو بورڈ میٹنگ بلائی جائے گی۔
براڈکاسٹرز بھی حتمی جواب دینے کا انتظار کر رہے ہیں۔ بھارتی ٹیم کے پاکستان آمد سے انکار کے بعد انڈین بورڈ چاہتا ہے کہ پول میچز کے ساتھ ساتھ سیمی فائنل اور فائنل بھی نیوٹرل مقام پر ہوں، اور دبئی پاکستان اور بھارت کے میچ کا ممکنہ وینیو ہو سکتا ہے۔
پاکستانی کرکٹ بورڈ کا موقف ہے کہ اگر بھارتی ٹیم پاکستان میں نہیں کھیلتی تو ان کے میچز بھی نیوٹرل مقام پر ہونے چاہئیں، اور پاکستانی ٹیم بھی بھارت میں آئی سی سی ایونٹس نہیں کھیلے گی۔ براڈکاسٹرز کی شرائط کو مدنظر رکھتے ہوئے اس معاملے کو حتمی شکل دی جائے گی۔
By 
