شیر افضل مروت کی تین مقدمات میں عبوری ضمانت منظور

اسلام آباد کی انسداد دہشتگردی عدالت نے پاکستان تحریک انصاف (پی ٹی آئی) کے رہنما شیر افضل مروت کی تین مقدمات میں عبوری ضمانت منظور کرلی۔

انسداد دہشتگردی عدالت نے پی ٹی آئی رہنما کی 5، 5 ہزار روپے مچلکوں کے عوض 16 دسمبر تک عبوری ضمانت منظور کی۔ اسلام آباد کے ڈی چوک پر ہونیوالے احتجاج پر درج مقدمات پر انسداد دہشتگردی عدالت کے جج طاہر عباس سپرا نے درخواست ضمانت پر سماعت کی۔

مزید پڑھیں: گولی کیوں چلائی کیساتھ یہ بھی پوچھیں ڈی چوک آخر گئے کیوں؟ ایاز امیر کی کھل کر عمران خان پر تنقید

شیر افضل مروت اپنے وکیل کے ہمراہ عدالت میں پیش ہوئے۔ سماعت کے دوران شیر افضل مروت نے کہا کہ جج ابوالحسنات محمد ذوالقرنین نے میرے قومی اسمبلی والے الفاظ کی وجہ سے سماعت نہیں کی جس پر عدالت نے کہا کہ آپ ایسا نہ کیا کریں۔ پی ٹی آئی رہنما شیر افضل مروت نے کہا کہ سر کیا کریں مجبور ہوجاتے ہیں۔ جب انصاف کا نظام تباہ ہوتا ہے سب تباہ ہو جاتا ہے ۔

بعدازاں عدالت نے کیس کی سماعت 16 دسمبر تک ملتوی کر دی۔