پاکستان کرکٹ ٹیم کے بائیں ہاتھ کے اوپنر فخر زمان نے جنوبی افریقا کے خلاف سیریز میں فٹنس مسائل کی بنا پر قومی اسکواڈ سے باہر کیے جانے کے تاثر کو مسترد کر دیا
گزشتہ دنوں جب جنوبی افریقا کے خلاف ٹیسٹ، ایک روزہ اور ٹی ٹوئنٹی سیریز کے لیے اسکواڈ کا اعلان کیا گیا تو فخر زمان سمیت کئی اہم کھلاڑیوں کو اسکواڈ میں شامل نہیں کیا گیا تھا۔ فخر زمان کے بارے میں عبوری وائٹ بال ہیڈ کوچ عاقب جاوید نے کہا تھا کہ ان کا نام اس لیے نہیں شامل کیا گیا کیونکہ وہ ابھی فارم اور میچ فٹنس حاصل نہیں کر پائے ہیں۔
تاہم فخر زمان نے اس تاثر کو سختی سے رد کیا اور کہا کہ وہ مکمل فٹ ہیں۔ فخرزمان قومی ڈومیسٹک چیمپئنز ٹی ٹوئنٹی کپ میں مارخورز کی ٹیم کا حصہ ہیں ۔انہوں نے لائنز کے خلاف اپنے ٹیم کے افتتاحی میچ کے دوران ایک انٹرویو میں اپنی فٹنس اور پاکستان ٹیم میں واپسی سے متعلق سوالات کے جواب دیے۔
انہوں نے کہاکہ میں فٹ ہوں اور اسی لیے کھیل رہا ہوں اور اگر مجھے موقع ملا تو میں پاکستان ٹیم کے لیے ضرور کھیلوں گا۔ انہوں نے مزید کہاکہ میں نے اپنا کیریئر چیمپئنز ٹرافی سے شروع کیا تھا اور شکر گزار ہوں کہ میری کارکردگی اچھی رہی اور ہم نے وہاں میچ جیتے۔ میری پوری کوشش ہوگی کہ میں ٹیم میں واپس آ کر اچھی کارکردگی دکھا سکوں۔
واضح رہے کہ عاقب جاوید نے یہ بھی کہا تھا کہ قومی سلیکشن کمیٹی فخر زمان کے ساتھ رابطے میں ہے اور انہیں فٹنس حاصل کرنے کے بعد منتخب کیا جائے گا۔فخر زمان نے پاکستان کے لیے آخری میچ جون 2024 میں آئی سی سی مینز ٹی 20 ورلڈ کپ کے دوران کھیلا تھا۔
By 
