اسلام آباد ایکسائز اینڈ ٹیکسیشن ڈیپارٹمنٹ نے ٹوکن ٹیکس کی عدم ادائیگی پر گاڑیوں کی رجسٹریشن منسوخ کرنے کا فیصلہ کرلیا۔
اس اقدام کا مقصد ٹیکس کی وصولی کو یقینی بنانا اور نادہندگان کے خلاف سخت کارروائی کرنا ہے۔ گاڑیوں کی رجسٹریشن کی منسوخی کا عمل یکم جنوری 2025 سے شروع ہوگا اور ٹوکن ٹیکس ادا نہ کرنے والے گاڑیوں کے مالکان کو سخت قانونی نتائج کا سامنا ہوگا۔
اگر کوئی گاڑی کا مالک ٹوکن ٹیکس کی عدم ادائیگی کی وجہ سے گاڑی کی رجسٹریشن منسوخ ہونے کے بعد اسے دوبارہ بحال کروانا چاہتا ہے تو اس پر 200% جرمانہ عائد کیا جائے گا۔ اس کے علاوہ گاڑیوں کی رجسٹریشن کی بحالی کے عمل میں مزید پیچیدگیاں پیدا ہو سکتی ہیں، جس سے شہریوں کو مزید مشکلات کا سامنا ہو گا۔
ایکسائز اینڈ ٹیکسیشن ڈیپارٹمنٹ نے تمام ٹوکن ٹیکس نادہندگان کو پندرہ دن کی مہلت دی ہے کہ وہ فوری طور پر اپنے ٹوکن ٹیکس کی ادائیگی کر دیں۔ اس مہلت کے دوران ٹیکس ادا نہ کرنے والوں کے خلاف قانونی کارروائی کی جائے گی، جس میں گاڑی کی رجسٹریشن منسوخی اور دیگر پابندیاں شامل ہوں گی۔
ڈائریکٹر ایکسائز اینڈ ٹیکسیشن بلال اعظم خان نے شہریوں سے درخواست کی ہے کہ وہ کسی بھی قانونی کارروائی سے بچنے کے لیے فوری طور پر اپنے ٹوکن ٹیکس کی ادائیگی کریں۔ ان کا کہنا تھا کہ اس فیصلے کا مقصد ٹیکس کے نظام کو بہتر بنانا اور شہریوں کو قانونی مشکلات سے بچانا ہے۔
یہ فیصلہ شہریوں کو ٹیکس کی اہمیت کے بارے میں آگاہ کرنے اور نادہندگان کے خلاف سخت کارروائی کرنے کے لیے کیا گیا ہے۔ گاڑیوں کے مالکان جو کئی سالوں سے ٹوکن ٹیکس ادا نہیں کر رہے ہیں، انہیں اب فوری طور پر اس واجب الادا رقم کو جمع کروانا ہوگا تاکہ ان کی گاڑیوں کی رجسٹریشن منسوخ نہ ہو۔
By 
