حکومت نے سنجیدہ مذاکرات نہ کئے تو 14 دسمبر سے سول نافرمانی شروع ہوگی، شوکت یوسفزئ

پشاور: پی ٹی آئی کے رہنما شوکت یوسفزئی نے کہا ہے کہ اگر حکومت نے سنجیدہ مذاکرات نہ کیے تو 14 دسمبر سے سول نافرمانی کا اعلان کر دیا جائے گا۔

انہوں نے کہا کہ پاکستان تحریک انصاف نے احتجاج اور مذاکرات کے لیے حکمت عملی وضع کرلی ہے، اور یہ احتجاج تب تک جاری رہے گا جب تک حکومت کے ساتھ نتیجہ خیز مذاکرات نہیں ہوتے۔ شوکت یوسفزئی نے حکومت کو خبردار کرتے ہوئے کہا کہ اگر حکومت نے سنجیدہ مذاکرات کی طرف قدم نہ بڑھایا تو پی ٹی آئی سول نافرمانی کی تحریک شروع کرے گی

انہوں نے مزید کہا کہ تحریک انصاف کا مقصد صرف اپنے حقوق کا تحفظ نہیں بلکہ پاکستان کے آئین و قانون کی بالادستی اور جمہوریت کی مضبوطی ہے۔ شوکت یوسفزئی کا کہنا تھا کہ حکومت کو عوامی مشکلات کا ادراک کرتے ہوئے جلد از جلد سنجیدہ مذاکرات کرنے چاہیے تاکہ ملک کی موجودہ سیاسی اور معاشی صورتحال پر قابو پایا جا سکے۔ انہوں نے یہ بھی واضح کیا کہ پی ٹی آئی کا احتجاج امن پسند اور جمہوری طریقے سے ہوگا اور اس کا مقصد کسی قسم کی خرابی یا تشویش پیدا کرنا نہیں بلکہ عوامی حقوق کے لیے آواز اٹھانا ہے

شوکت یوسفزئی نے اس بات پر زور دیا کہ تحریک انصاف حکومت کے ساتھ بات چیت کے دروازے بند نہیں کرنا چاہتی لیکن اگر حکومت نے اپنی ضد اور لاپرواہی جاری رکھی تو پی ٹی آئی اپنے عوامی حقوق کے لیے ہر ممکن اقدام اٹھائے گی۔