جناح ہاؤس حملہ کیس، عمران خان کی بھانجی حاجرہ نیازی قصور وار جبکہ 8ملزمان بے گناہ قرار

جناح ہاؤس حملہ سے متعلق جے آئی ٹی نے اپنی تفتیش میں حسان نیازی کی بہن اور عمران خان کی بھانجی حاجرہ نیازی کو قصور وار قرار دے دیا جبکہ 8 پی ٹی آئی کارکنوں کو بے گناہ قرار دیا گیا۔

انسداد دہشت گردی عدالت کے ایڈمن جج منظر علی گل کے روبرو جناح ہاؤس حملہ اور جلاو گھیراؤ کے مقدمے کی سماعت ہوئی۔ جے آئی ٹی نے اپنی تفتیش میں خواتین سمیت 8 پی ٹی آئی کارکنوں توصیف خانم، سعدیہ ایوب، ثروت شاہد، نادرہ عمر، وحید الرحمٰن، ساجد پرنس، بلال فرحانہ فاروق کو بے گناہ قرار دے دیا۔

مزید پڑھیں:  فوجی عدالتوں میں سویلینز کے ٹرائل کا کیس، گرفتار ملزمان کو عام جیلوں میں منتقل کرنے کی استدعا مسترد

عدالت نے ملزمان کے وکلاء کی عبوری ضمانت واپس لینے کی استدعا پر ضمانت کی درخواستوں کو خارج کر دیا۔جے آئی ٹی نے حاجرہ نیازی سمیت دیگر خواتین سیدہ فاطمہ حیدر، بینا ذیشان اور رخسانہ نوید کو قصور وار پایا۔

عدالت نے حاجرہ نیازی اور دیگر کی عبوری ضمانت میں 15 جنوری تک توسیع کر دی اور ضمانت پر دلائل طلب کر لیے۔دوران سماعت حاجرہ نیازی کے والد حفیظ اللہ نیازی بھی اپنی بیٹی کے ساتھ عدالت میں پیش ہوئے۔

دیگر خواتین سمیت تمام ملزمان عبوری ضمانت کی حاضری کے لیے عدالت میں موجود تھے۔