پشاور: پی ٹی آئی کا مذاکرات کیلئے آمادگی کا اظہار، گورنر راج مسترد

پشاور: پاکستان تحریک انصاف (پی ٹی آئی) کے سیکرٹری جنرل سلمان اکرم راجہ نے کہا ہے کہ پارٹی ہر ایک سے مذاکرات کے لیے تیار ہے۔

پشاور میں میڈیا سے گفتگو کرتے ہوئے سلمان اکرم راجہ نے کہا کہ عمران خان نے تمام قائدین پر اعتماد کا اظہار کیا ہے اور اس سلسلے میں مذاکراتی کمیٹی قائم کی ہے جس میں وہ خود اور دیگر رہنما بھی شامل ہیں۔
سلمان اکرم نے اس بات کی تردید کی کہ پی ٹی آئی سے استعفے مانگے جا رہے ہیں۔ انہوں نے کہا کہ یہ خبریں غلط ہیں اور اس کا حقیقت سے کوئی تعلق نہیں۔

انہوں نے اسٹیبلشمنٹ کے ساتھ مذاکرات کے حوالے سے کہا کہ پارٹی ہر ایک سے بات کرنے کے لیے تیار ہے۔ انہوں نے کہا کہ ہر مسئلے کے حل کیلئے مذاکرات ہونے چاہئیں۔
پی ٹی آئی کے سیکرٹری جنرل نے خیبر پختونخوا میں گورنر راج لگانے کے خیال کو مسترد کرتے ہوئے کہا کہ یہ بالکل غلط اور بے وقوفی ہوگی۔ انہوں نے مزید کہا کہ صوبے کو مزید انتشار میں نہیں ڈالا جانا چاہیے۔