آئی سی سی چیمپئنز ٹرافی کے تنازعے کی گتھی تاحال سلجھ نہیں سکی اور ایونٹ کا شیڈول ابھی تک جاری نہیں کیا جا سکا۔
پاکستان کرکٹ بورڈ اور بھارتی کرکٹ بورڈ کے درمیان ڈیڈ لاک برقرار ہے جبکہ پاکستان نے آئی سی سی اور بھارتی بورڈ کو اپنے موقف کے بارے میں واضح طور پر آگاہ کر دیا ہے۔
بھارت نے سکیورٹی خدشات کے پیش نظر پاکستان میں کرکٹ ٹیم بھیجنے سے انکار کیا تھا جبکہ پاکستان بھی اپنے موقف پر قائم ہے کہ دونوں ممالک کو ایک دوسرے کے ملک میں کرکٹ کھیلنے کا موقع ملنا چاہیے۔ یہی وجہ ہے کہ چیمپئنز ٹرافی کا شیڈول ابھی تک طے نہیں ہو سکا۔
پاکستان کرکٹ بورڈ نے اس تنازعے کے دیرپا حل کے لیے ایک پارٹنرشپ فارمولا پیش کیا تھا، جس کے تحت پاکستان اور بھارت ایک دوسرے کے ملک میں کسی بھی ایونٹ کا انعقاد نہیں کریں گے۔ اس فارمولے کے مطابق چیمپئنز ٹرافی کے میچز دبئی میں کھیلے جائیں گے اور اگلے تین سال تک دونوں ممالک اپنے تمام میچز دبئی میں ہی کھیلیں گے۔
تاہم اس فارمولے پر تاحال بھارتی کرکٹ بورڈ یا آئی سی سی کی جانب سے باضابطہ جواب نہیں آیا ہے۔دوسری جانب بھارتی میڈیا کے مطابق چیمپئنز ٹرافی کے تنازعے میں مزید تاخیر کی وجہ سے ایونٹ کو روایتی ون ڈے فارمیٹ سے تبدیل کرکے ٹی ٹوئنٹی فارمیٹ میں کرانے پر غور کیا جا رہا ہے۔
بھارت کی معروف کرکٹ ویب سائٹ کرک بزنے دعویٰ کیا ہے کہ چیمپئنز ٹرافی کے لیے ون ڈے فارمیٹ کی گرتی ہوئی مقبولیت اور شائقین میں ٹی ٹوئنٹی کرکٹ کی بڑھتی ہوئی پسندیدگی کے پیش نظر یہ ممکنہ تبدیلی کی جا سکتی ہے۔تاہم اس حوالے سے ابھی تک کوئی واضح فیصلہ نہیں ہوا ہے۔
By 
