ملک کے مختلف شہروں میں بارش اور برفباری کی پیشگوئی

محکمہ موسمیات نے ملک کے مختلف شہروں میں بارش اور برفباری کی پیشگوئی کردی۔

محکمہ موسمیات کے مطابق ملک کے بیشتر علاقوں میں موسم سرد اور خشک رہنے کا امکان ہے جبکہ پہاڑی علاقوں میں شدید سردی اور جزوی طور پر ابر آلود موسم کی پیشگوئی کی گئی۔

اسلام آباد اور اس کے گرد و نواح میں بھی موسم سرد اور مطلع جزوی طور پر ابر آلود رہنے کی توقع ہے۔بلوچستان کے بیشتر اضلاع میں موسم سرد اور خشک رہنے کے ساتھ ساتھ پہاڑی علاقوں میں شدید سردی کا سامنا رہے گا۔ میدانی علاقوں میں جھکڑ اور تیز ہوائیں چلنے کا امکان بھی ظاہر کیا گیا ہے۔

پنجاب کے بیشتر اضلاع میں بھی موسم سرد اور خشک رہنے کا امکان ہےجبکہ مری، گلیات اور ان کے گرد و نواح میں موسم شدید سرد اور جزوی ابر آلود رہنے کی توقع ہے۔سندھ کے بیشتر اضلاع میں موسم سرد اور خشک رہے گا، تاہم صبح کے اوقات میں سکھر، شکارپور، کشمور، خیرپور اور گرد و نواح میں ہلکی دھند چھا سکتی ہے۔

پشاور سمیت خیبر پختونخوا کے بیشتر اضلاع میں موسم خشک اور سرد رہے گا، تاہم خیبر پختونخوا کے بالائی اضلاع میں ہلکی بارش اور برفباری کا امکان ہے۔ بارش اور برفباری کی وجہ سے سردی کی شدت میں مزید اضافہ متوقع ہے۔

پشاور میں کم سے کم درجہ حرارت 2 ڈگری سینٹی گریڈ اور زیادہ سے زیادہ 10 ڈگری سینٹی گریڈ ریکارڈ کیا گیا ہے۔ محکمہ موسمیات کے مطابق خیبر پختونخوا کے بالائی اضلاع جیسے کالام میں درجہ حرارت منفی 5 سینٹی گریڈ، دیر میں منفی 4 سینٹی گریڈ، جبکہ چترال، ایبٹ آباد، شانگلہ، تورغر اور جنوبی وزیرستان میں منفی 2 سینٹی گریڈ ریکارڈ کیا گیا ہے۔

کشمیر میں موسم شدید سرد اور جزوی ابر آلود رہنے کی توقع ہے، جبکہ گلگت بلتستان میں جزوی ابر آلود موسم کے ساتھ ہلکی بارش اور پہاڑی علاقوں میں ہلکی برفباری کا امکان ظاہر کیا گیا ہے۔