عمران خان تک رسائی نہ ملنے پر خدیجہ شاہ کا چیف جسٹس سپریم کورٹ کے نام خط

سپریم کورٹ کی جیل اصلاحاتی کمیٹی کی رکن خدیجہ شاہ نے اڈیالہ جیل میں عمران خان تک رسائی نہ ملنے پر چیف جسٹس آف پاکستان کو خط ارسال کر دیا۔

خدیجہ شاہ نے چیف جسٹس آف سپریم کورٹ یحیٰی آفریدی کو خط میں لکھا کہ جیل اصلاحات کی ذیلی کمیٹی نے گزشتہ روز اڈیالہ جیل راولپنڈی کا دورہ کیا، جس دوران سپرٹینڈنٹ اڈیالہ جیل اور دیگر عملہ کمیٹی کے ہمراہ موجود رہا۔ خط میں ذکر کیا گیا کہ دورے کے دوران ہماری آمد کے پیش نظر جیل میں صفائی کا خاص خیال رکھا گیا اور مختلف حصوں کا جائزہ لیا گیا۔

خدیجہ شاہ نے بتایا کہ کمیٹی نے جیل کے ہسپتال، خواتین کی بیرک، دماغی صحت کے مسائل اور منشیات کے استعمال کے قیدیوں کی بیرکس کا بھی دورہ کیا۔ اس کے علاوہ کمیٹی نے سزائے موت کے قیدیوں سے بھی ملاقات کی۔

انہوں نے کہا کہ جیل اصلاحات کی ذیلی کمیٹی کے دورے کا مقصد قیدیوں کے ساتھ روا رکھے جانے والے سلوک اور ان کے حقوق کی جانچ کرنا ہےجو کہ عالمی سطح پر تسلیم شدہ معیار جیسے منڈیلا رولز اور بنکاک رپورٹ میں طے کیے گئے ہیں۔

خدیجہ شاہ نے مزید بتایا کہ اڈیالہ جیل میں گزشتہ دو سالوں میں بہت سے سیاسی قیدی رکھے گئے ہیں، جن میں پاکستان کے سابق وزیر اعظم عمران خان بھی شامل ہیں۔ ان کا کہنا تھا کہ چونکہ عمران خان ایک سیاسی قیدی ہیں، ان کی رائے حاصل کرنا ضروری تھی۔

انہوں نے خط میں کہا کہ جیل اصلاحات کی میٹنگز میں جیل انتظامیہ اور سرکاری افسران کو واضح طور پر ہدایت کی گئی تھی کہ ذیلی کمیٹی کو جیل کے تمام حصوں اور تمام قیدیوں تک مکمل رسائی دی جائے گی۔

سپریم کورٹ کی ہدایت کے مطابق کمیٹی کو جیل کے عملے کی نگرانی کے بغیر آزادانہ گھومنے کی اجازت بھی دی گئی تھی۔تاہم جب جیل انتظامیہ سےسابق وزیر اعظم عمران خان کی بیرکس میں جانے کی درخواست کی تو انہوں نےکمیٹی کو رسائی دینے سے انکار کر دیااورڈی آئی جی جیل خانہ جات سے درخواست کے باوجود عمران خان سے ملاقات کی اجازت نہیں دی گئی۔

انہوں نے چیف جسٹس سے درخواست کی کہ جیل اصلاحات کی ذیلی کمیٹی کے لیے ایک بار پھر اڈیالہ جیل کے دورے کے احکامات دیے جائیں اور کمیٹی کو سابق وزیر اعظم عمران خان تک رسائی فراہم کی جائے۔ خدیجہ شاہ نے یہ بھی کہا کہ جب تک سابق وزیر اعظم کی رائے حاصل نہیں کی جاتی، جیل اصلاحات کی کمیٹی سپریم کورٹ کو اپنی رائے پیش نہیں کر سکتی۔