پاکستان کی ڈیجیٹل پیمنٹ کی جانب اہم پیشرفت، اینڈرائیڈ صارفین کیلئے اچھی خبر آگئی، گوگل کی جانب سے اس کے موبائل پیمنٹ سسٹم گوگل والٹ ( گوگل پے ) کو پاکستان میں متعارف کرانے کی تیاری کی جا رہی ہے۔
گوگل کی جانب سے جنوری 2025 میں یہ پیمنٹ سسٹم پاکستان میں متعارف کرائے جانے امکان ہے جو ڈیجیٹل پیمنٹ کے حوالے سے صارفین کے لیے اہمیت کی حامل ہے۔ کمپنی کی جانب سے یہ اعلان اس کے ڈویلپر پیج پر بتایا گیا کہ پاکستان سمیت 16 ممالک میں گوگل والٹ کو متعارف کرایا جا رہا ہے، اس اعلان کے ساتھ نیچے یہ بھی بتایا گیا کہ مصر، پاکستان اور وینزویلا میں یہ سروس جنوری 2025 میں لانچ کی جا رہی ہے۔
گوگل والٹ ایک ایسا ڈیجیٹل والٹ ہے جو صارف کو اپنے ڈیبٹ یا کریڈٹ کارڈ کی تفصیلات محفوظ طریقے سے اسٹور کرنے کی سہولت فراہم کرتا ہے جبکہ وہ اپنے اینڈرائیڈ فونز سے براہ راست ادائیگیاں بھی کرسکتے ہیں۔
اس میں بورڈنگ پاس، ایونٹ ٹکٹس، شناخت کارڈ اور کافی کچھ گوگل والٹ میں محفوظ کیا جا سکتا ہے یعنی جو کچھ آپ اپنے روایتی بٹوے میں رکھ کر چلتے ہیں، وہ سب کچھ گوگل والٹ میں محفوٖظ کیا جاسکتا ہے۔
اسے استعمال کرنے کے لیے گوگل والٹ ایپ کو انسٹال کرنا ہوگا، ایپ کو انسٹال کرنے کے بعد آپ کو گوگل اکاؤنٹ پر لاگ ان ہونا ہوگا اور پھر ادائیگی کے طریقے جیسے کریڈٹ یا ڈیبٹ کارڈ کو ایڈ کرنا ہوگا۔
جب آپ اپنے اکاؤنٹ میں کم از کم ایک کارڈ ایڈ کرلیں تو آپ گوگل والٹ کے ذریعے اسٹورز میں موبائل پیمنٹس کرسکیں گے۔
گوگل نے اس سروس کو 2011 میں لانچ کیا تھا اور گوگل والٹ کریڈٹ یا ڈیبیٹ کارڈ کو استعمال کرنے کے مقابلے میں زیادہ محفوظ سروس ہے۔
اس کے ذریعے کی جانے والی ادائیگیاں انکرپٹڈ ہوتی ہیں یعنی ہر خریداری پر سروس کی جانب سے ایک منفرد کوڈ استعمال کرکے پیمنٹ انفارمیشن بھیجی جاتی ہے ، اگر کوئی اس ڈیٹا تک رسائی حاصل کرلے تو بھی وہ اس کے کسی کام کا نہیں ہوتا کیونکہ اس میں ڈیبیٹ یا کریڈٹ کی تفصیلات موجود نہیں ہوتیں۔
اس کے ذریعے صارفین اپنے اسمارٹ فونز سے کانٹیکٹ لیس پیمنٹ کرسکتے ہیں یعنی اپنے ساتھ کارڈ رکھنے کی بھی ضرورت نہیں ہوگی، جس سے ان کے گم یا چوری ہونے کا خطرہ بھی نہیں ہوتا۔
By 
