لندن: برطانوی امیگریشن حکام نے غیر قانونی تارکین وطن اور انہیں ملازمتیں دینے والوں کے خلاف بڑے پیمانے پر کریک ڈاؤن کا آغاز کر دیا ہے۔
حکام کا کہنا ہے کہ مختلف علاقوں میں چھاپے مارے جا رہے ہیں تاکہ ملک میں غیر قانونی طور پر موجود افراد اور ان کے استحصال میں ملوث مالکان کو پکڑا جا سکے۔
امیگریشن حکام کا کہنا ہے کہ جو افراد غیر قانونی تارکین وطن کو ملازمت دیتے ہیں، ان پر الزام ثابت ہونے کی صورت میں فی ملازم 60 ہزار پاؤنڈ تک جرمانہ عائد کیا جا سکتا ہے۔
یہ اقدام ان لوگوں کو روکنے کے لیے کیا جا رہا ہے جو سستے مزدوروں کے لیے غیر قانونی طور پر مقیم افراد کو ملازمت دیتے ہیں اور ان کا استحصال کرتے ہیں۔
رپورٹ میں بتایا گیا ہے کہ غیر قانونی تارکین وطن کو کم تنخواہیں دے کر اور سخت شرائط پر کام کروا کر ان کے بنیادی حقوق کی خلاف ورزی کی جا رہی تھی۔ حکام کا کہنا ہے کہ یہ عمل نہ صرف انسانی حقوق کی خلاف ورزی ہے بلکہ یہ معیشت کو نقصان پہنچانے کے مترادف بھی ہے۔
برطانوی حکومت کا کہنا ہے کہ اس کریک ڈاؤن کا مقصد ملک میں غیر قانونی سرگرمیوں کو روکنا اور منصفانہ کام کے مواقع کو فروغ دینا ہے۔ حکام نے عوام سے بھی اپیل کی ہے کہ وہ اس حوالے سے معلومات فراہم کریں تاکہ غیر قانونی سرگرمیوں کو جلد از جلد روکا جا سکے۔
By 
