پاکستان تحریک انصاف کا حکومت کے سامنے دو اہم مطالبات رکھنے کا فیصلہ

پاکستان تحریک انصاف نے حکومت کے سامنے دو اہم مطالبات رکھنے کا فیصلہ کرلیا۔

تفصیلات کے مطابق پی ٹی آئی نے مشاورت کے بعد حکومت کے سامنے دو اہم مطالبات رکھنے کا فیصلہ کرلیا جو کہ حکومتی ٹیم کو تحریری طور پر پیش کیے جائیں گے۔

میڈیا رپورٹس کے مطابق پی ٹی آئی کی قیادت نے جوڈیشل کمیشن بنانے اور قیدیوں کی رہائی کے مطالبات پر تبادلہ خیال کیا۔ پارٹی کی جانب سے حکومتی ٹیم کے سامنے سب سے پہلا مطالبہ 9 مئی اور 26 نومبر کے واقعات کی تحقیقات کے لیے جوڈیشل کمیشن بنانے کا ہوگا۔

مزید پڑھیں: چیئرمین پبلک اکاؤنٹس کمیٹی کون ہو گا ؟ فیصلہ میں کرونگا : بانی پی ٹی آئی

اس کے علاوہ پی ٹی آئی جیلوں میں بند اپنے کارکنوں کی رہائی کا بھی تحریری مطالبہ کرے گی۔ تحریک انصاف اور حکومت کی مذاکراتی کمیٹیوں کے درمیان بات چیت 2 جنوری کو ہوگی۔

دوسری جانب پی ٹی آئی رہنما اسد قیصر نے تصدیق کی ہے کہ 2 جنوری کو حکومت کے ساتھ مذاکرات ہوں گےاور اس سلسلے میں وہ اپنی مذاکراتی ٹیم سے مشاورت کر رہے ہیں۔

اسد قیصر کا کہنا تھا کہ پی ٹی آئی کے مطالبات واضح ہیں، جن میں پارٹی کے بانی کی رہائی اور جوڈیشل کمیشن کا قیام شامل ہیں۔ انہوں نے مزید کہا کہ پی ٹی آئی ملک کو آگے بڑھانے کے لیے ہر ممکن تعاون فراہم کرے گی اور مذاکرات میں شامل تمام ارکان اگلی ملاقات کا حصہ ہوں گے۔