کوہاٹ: ضلع کرم میں قیام امن کیلئے آج فریقین کے درمیان معاہدہ طے پانے کا امکان ہے، جس پر دستخط کرنے کے لیے کمشنر ہاؤس کوہاٹ میں گرینڈ جرگہ آج منعقد ہوگا۔
ذرائع کے مطابق، معاہدے پر دستخط کرنے والے فریق کے مشران کئی دن سے کوہاٹ میں موجود ہیں، جبکہ دوسرے فریق کے مشران، جو مزید 2 دن کی مہلت مانگ چکے ہیں، آج کوہاٹ پہنچ جائیں گے۔
مشیر اطلاعات خیبر پختونخوا بیرسٹر سیف نے کہا ہے کہ فریقین میں عمومی اتفاقِ رائے ہوچکا ہے۔ امن معاہدے میں بنکرز کا خاتمہ، فریقین کی بھاری اسلحے سے دست برداری، اور ٹل پارہ چنار روڈ پر نقل و حرکت کو کانوائے کی صورت میں کرنے کی شرائط شامل ہیں۔ دہشت گردی کے واقعات کی صورت میں صرف حکومت کو کارروائی کا اختیار حاصل ہوگا۔
واضح رہے کہ تقریباً تین ماہ سے ٹل پارہ چنار شاہراہ بند ہونے کی وجہ سے پارہ چنار میں غذا اور ادویات کی کمی کے باعث حالات انتہائی تشویشناک ہیں۔ اس بندش کے خلاف پارہ چنار میں دھرنا جاری ہے، اور پشاور، لاہور، کراچی، جھنگ، ملتان، مظفرآباد اور گلگت سمیت مختلف شہروں میں بھی احتجاجی دھرنے دیے جا رہے ہیں۔
By 
