پاکستان اور بھارت کے درمیان ایٹمی تنصیبات کی فہرستوں کا تبادلہ

اسلام آباد: پاکستان اور بھارت نے اپنی جوہری تنصیبات اور سہولیات کی فہرستوں کا تبادلہ کیا۔

یہ تبادلہ پاکستان اور بھارت کے درمیان جوہری تنصیبات اور سہولیات کے خلاف حملوں کی ممانعت کے معاہدے کے تحت ہوا، جو 31 دسمبر 1988 کو دستخط کیا گیا تھا۔

اس معاہدے کے مطابق دونوں ممالک ہر سال یکم جنوری کو اپنی جوہری تنصیبات اور سہولیات کی فہرست ایک دوسرے کو فراہم کرتے ہیں۔ پاکستان میں جوہری تنصیبات کی فہرست باضابطہ طور پر وزارت خارجہ اسلام آباد میں بھارتی ہائی کمیشن کے نمائندے کے حوالے کی گئی، جبکہ ہندوستانی وزارت خارجہ نے ہندوستان کی جوہری تنصیبات کی فہرست پاکستانی ہائی کمیشن کے نمائندے کے حوالے کی۔

پاکستان اور بھارت کے درمیان 27 جنوری 1991 کو جوہری تنصیبات کے خلاف حملوں کی ممانعت کے معاہدے پر عمل درآمد کے بعد دونوں ممالک یکم جنوری 1992 سے فہرستوں کا تبادلہ کر رہے ہیں۔