زیارت میں شدید برفباری، مری سمیت مختلف شہروں میں بارش ہونے کی پیش گوئی

زیارت میں شدید برفباری کے باعث سردی کی شدت میں اضافہ،  محکمہ موسمیات نے مری سمیت دیگر علاقوں میں بارشوں کی پیش گوئی کر دی۔

محکمہ موسمیات کے مطابق مری اور دیگر مختلف علاقوں میں بارش کی توقع ہے، جبکہ بالائی خیبرپختونخوا، شمالی بلوچستان، گلگت بلتستان، کشمیر اور ملحقہ پہاڑی علاقوں میں بارش اور پہاڑوں پر برفباری ہو سکتی ہے۔ اسلام آباد اور اس کے گرد و نواح میں موسم سرد رہنے کے ساتھ جزوی ابر آلود صورتحال اور رات کے وقت ہلکی بارش کا امکان ہے۔

رپورٹ کے مطابق زیارت میں شدید برفباری کے باعث سردی کی شدت میں اضافہ ہوگیا ہے اور اس کی وجہ سے گیس کی فراہمی بھی معطل ہو گئی ہے۔ زیارت کوئٹہ زیارت سنجاوی مین شاہراہ بھی برفباری کی وجہ سے ٹریفک کے لیے بند ہو گئی ہے۔

کسی بھی ناخوشگوار واقعے سے بچنے کے لیے کنٹرول روم قائم کیا گیا ہے۔ ڈپٹی کمشنر زیارت نے شہریوں سے اپیل کی ہے کہ برفباری اور سردی کے باعث غیر ضروری سفر سے گریز کریں۔

کراچی میں موسم سرما کی پہلی بارش کے بعد سردی میں مزید اضافہ ہو گیا ہے۔ مختلف علاقوں جیسے گلشن معمار، بلدیہ ٹاؤن، اورنگی ٹاؤن، نارتھ ناظم آباد، نمائش چورنگی، فیڈرل بی ایریا، ایم اے جناح روڈ، شارع فیصل اور یونیورسٹی روڈ پر ہلکی بارش ہوئی، جس سے ویک اینڈ کا مزہ دوبالا ہو گیا۔

موسم کا حال بتانے والوں نے کہا ہے کہ چترال، دیر، سوات، کوہستان، باجوڑ، خیبر، شانگلہ، بونیر، بٹگرام، مانسہرہ اور ایبٹ آباد میں بارش اور پہاڑوں پر برفباری کی پیش گوئی کی گئی ہے۔صوابی، مردان، پشاور، نوشہرہ، کوہاٹ، کرک، کرم، اورکزئی اور وزیرستان میں بھی رات کے اوقات میں ہلکی بارش ہو سکتی ہے۔

بلوچستان کے بیشتر علاقوں میں سرد موسم اور جزوی ابر آلود حالات رہنے کا امکان ہے۔ چمن، پشین، زیارت، قلعہ عبداللہ، قلعہ سیف اللہ، ژوب اور بارکھان میں بارش اور ہلکی برفباری ہو سکتی ہے۔ پنجاب کے بیشتر اضلاع میں بھی سرد موسم اور جزوی ابر آلود صورتحال کی توقع ہے۔

مری، گلیات اور گرد و نواح میں تیز ہوائیں چلنے کے علاوہ رات کے اوقات میں بارش اور برفباری کا امکان ہے۔

محکمہ موسمیات کے مطابق رات کے دوران سیالکوٹ، نارووال، گوجرانوالہ، منگلا، جہلم، راولپنڈی، لاہور، شیخوپورہ، قصور، اوکاڑہ، ساہیوال، سرگودھا، ٹوبہ ٹیک سنگھ، حافظ آباد، فیصل آباد، جھنگ، بھکر، لیہ، ملتان، بہاولپور، بہاولنگر، خانیوال، خانپور، رحیم یار خان، ڈی جی خان اور اس کے گرد و نواح میں شدید دھند چھا سکتی ہے۔

سندھ کے بیشتر علاقوں میں موسم سرد اور خشک رہنے کی توقع ہے، جبکہ کشمیر اور گلگت بلتستان میں شدید سرد موسم اور بارش و برفباری کا امکان ہے۔