اسلام آباد: وزیراعظم شہباز شریف نے لیسکو میں کرپشن کے الزامات کے تحت نکالے گئے 12 افسران کی بحالی کے معاملے کا نوٹس لے لیا۔
وزیراعظم کے نوٹس کے بعد ایک اعلیٰ سطحی کمیٹی تشکیل دی گئی ہے تاکہ اس معاملے کی تحقیقات کی جا سکیں۔ نوٹیفکیشن کے مطابق کمیٹی میں سابق سیکریٹری پاور شاہد خان، موجودہ سیکریٹری انرجی اور آئی بی سمیت لیسکو بورڈ کے ایک ایک نمائندہ بھی شامل ہیں۔
کمیٹی کی تشکیل کا مقصد لیسکو مینجمنٹ پر عائد الزامات کی تحقیقات کرنا ہے، جن میں 12 افسران کی بحالی کے بدلے رشوت لینے اور بین الاقوامی کمپنی سے سامان کی خریداری جیسے الزامات شامل ہیں۔
نوٹیفکیشن میں مزید کہا گیا ہے کہ لیسکو مینجمنٹ پر ایک نجی ہاؤسنگ سوسائٹی کو غیرقانونی کنکشن دینے اور ادارہ جاتی قوانین کو نظر انداز کرنے کے الزامات بھی ہیں۔ ذرائع کے مطابق، سابق چیف ایگزیکٹو چوہدری محمد امین کی تعیناتی بھی غیرقانونی قرار دی گئی تھی۔
کمیٹی نے فیصلہ کیا ہے کہ موجودہ لیسکو چیف، چیئرمین بورڈ اور دیگر افسران کو کل اسلام آباد طلب کیا جائے گا۔ انرجی ڈویژن کے ذرائع نے بتایا ہے کہ کمیٹی 10 جنوری تک اپنی حتمی رپورٹ وزیراعظم کو پیش کرے گی۔
By 
