سوشل میڈیا پر ریاست مخالف مواد: شہباز گل کے خلاف ایف آئی اے میں مقدمہ درج

وفاقی تحقیقاتی ادارے (ایف آئی اے) کے سائبر کرائم رپورٹنگ سینٹر نے شہباز گل کے خلاف مبینہ طور پر ریاست مخالف اور دھمکی آمیز مواد سوشل میڈیا پر پوسٹ کرنے پر مقدمہ درج کر لیا۔

ایف آئی آر نمبر 19/2025 پریوینشن آف الیکٹرانک کرائمز ایکٹ (پی ای سی اے) 2016 کی دفعات 9، 10 اور 11 کے تحت درج کی گئی ہے۔ شہباز گل پر الزام ہے کہ وہ ٹک ٹاک پر @shahbaz gill04نامی ہینڈل سے اکاؤنٹ چلا رہے ہیں اور ایسی ویڈیوز شیئر کر رہے ہیں جو معلومات کو غلط انداز میں پیش کرنے، بدامنی پھیلانے اور مسلح افواج کے اہلکاروں اور عوام میں نفرت پیدا کرنے کا باعث بن رہی ہیں۔

مزید پڑھیں: ریاست مخالف پراپیگنڈا کرنے کا الزام، معید پیرزادہ کیخلاف ایف آئی اے میں مقدمہ درج

ایف آئی آر کے مطابق ان ویڈیوز میں پاکستان کی فوجی قیادت کے خلاف کرپشن اور رشوت میں ملوث ہونے کے بے بنیاد الزامات عائد کیے گئے ہیں۔ ایف آئی آر میں مزید کہا گیا کہ اس قسم کا مواد مسلح افواج میں تفریق پیدا کرنے اور ریاست کی سالمیت کو نقصان پہنچانے کا سبب بن سکتا ہے۔

حکام کا مزید کہنا ہے کہ شہباز گل کے اقدامات ریاستی اداروں پر عوام کے اعتماد کو متاثر کرنے، دشمنی کو بڑھاوا دینے اور ریاست کے خلاف نفرت پیدا کرنے کے لیے کیے گئے۔ مذکورہ بالا حقائق کو مدنظر رکھتے ہوئے سفارش کی جاتی ہے کہ براہ کرم قانون کے مطابق مذکورہ بالا فرد کے خلاف مقدمہ درج کرنے کی اجازت دی جائے۔