مارول سنیماٹک یونیورس کے مداحوں کے لیے خوشخبری ہے کہ آنے والی فلم ’’اسپائیڈر مین، برینڈ نیو ڈے‘‘ کے بارے میں نئی اور دلچسپ تفصیلات سامنے آگئی ہیں، جن سے اشارہ ملتا ہے کہ پیٹر پارکر کی زندگی ایک نئے اور غیر متوقع مرحلے میں داخل ہونے والی ہے۔
میڈیارپورٹس کے مطابق فلم کی کہانی ’’اسپائیڈر مین، نو وے ہوم‘‘کے واقعات کے بعد شروع ہوگی، جہاں ڈاکٹر اسٹرینج کے جادو کے نتیجے میں پوری دنیا پیٹر پارکر کی شناخت بھول چکی ہے۔ اب پیٹر مکمل تنہائی میں زندگی گزار رہا ہے اور ایک سادہ اپارٹمنٹ میں رہتے ہوئے خود تیار کردہ سوٹ کے ساتھ نیویارک شہر کی حفاظت کر رہا ہے۔
سونی پکچرز کی جانب سے جاری کردہ خلاصے میں بتایا گیا ہے کہ پیٹر پارکر کی مشکلات کم ہونے کے بجائے مزید بڑھنے والی ہیں۔ اس کے دوست اپنی زندگیوں میں آگے بڑھ چکے ہیں جبکہ وہ تنہا اپنی ذمہ داریوں کا بوجھ اٹھا رہا ہے۔
فلم کے بارے میں سامنے آنے والی نئی معلومات کے مطابق پیٹر پارکر کی شخصیت میں ایک ایسی تبدیلی رونما ہوگی جس پر اس کا کوئی اختیار نہیں ہوگا۔ ساتھ ہی نیویارک شہر کو ایک نئے اور پراسرار خطرے کا سامنا بھی ہوگا، جس کے بارے میں کہا جا رہا ہے کہ یہ ایسا ولن ہوگا جسے کوئی دیکھ نہیں سکے گا۔
فلم کے خلاصے میں پیٹر پارکر کے جذباتی سفر کو بھی نمایاں کیا گیا ہے۔ اس میں کہا گیا ہے کہ اگرچہ دنیا اسے بھول چکی ہے، لیکن وہ اب بھی اپنے وعدوں اور ذمہ داریوں کو نہیں بھولا۔
میڈیا رپورٹس میں یہ دعویٰ بھی کیا جا رہا ہے کہ نئی فلم میں پیٹر پارکر کے کردار میں ایک حیران کن جسمانی تبدیلی دیکھنے کو مل سکتی ہے، تاہم مارول اسٹوڈیوز نے اس حوالے سے تاحال کوئی باضابطہ تفصیل جاری نہیں کی۔
دوسری جانب مداحوں میں یہ قیاس آرائیاں بھی زور پکڑ رہی ہیں کہ مارول یونیورس میں ایکس مین کرداروں کی انٹری کا راستہ ہموار کیا جا رہا ہے۔ اداکارہ سیڈی سنک کی کاسٹنگ کے بعد یہ چہ مگوئیاں جاری ہیں کہ وہ ممکنہ طور پر جین گرے کا کردار ادا کر سکتی ہیں، تاہم اس حوالے سے بھی کوئی سرکاری تصدیق سامنے نہیں آئی۔
فلم کے مرکزی ولن کی شناخت اب تک راز بنی ہوئی ہے، جس نے مداحوں کے تجسس میں مزید اضافہ کر دیا ہے۔ نئی تفصیلات سے اندازہ ہوتا ہے کہ ’’اسپائیڈر مین، برینڈ نیو ڈے‘‘ نہ صرف پیٹر پارکر کی زندگی کا نیا باب ثابت ہوگی بلکہ مارول یونیورس کے مستقبل کے لیے بھی اہم بنیاد رکھ سکتی ہے۔
By 
