قومی کرکٹ ٹیم کے سابق کپتان و وکٹ کیپر بیٹر سرفراز احمد نے چیمپئنز ٹرافی 2025کی سیمی فائنلسٹ ٹیموں کی پیش گوئی کر دی۔
آئی سی سی چیمپئنز ٹرافی کا 19 فروری سے پاکستان میں آغاز ہونے جا رہا ہے۔ ایونٹ میں بھارت اپنے میچز نیوٹرل مقام دبئی میں کھیلے گا۔ایونٹ کے لئے ٹیموں کی طرف سے بھرپور تیاریاں کی جارہی ہیں۔2017 میں آئی سی سی چیمپئنز ٹرافی جیتنے والے کپتان سرفراز احمد نے 19فروری سے شروع ہونیوالے ایونٹ کے لئے سیمی فائنلسٹ ٹیموں کی پیش گوئی کر دی۔
سرفراز احمد نے کہا کہ انگلینڈ، جنوبی افریقہ اور نیوزی لینڈ کی ٹیمیں سیمی فائنل کی دوڑ سے باہر ہو جائیں گی ۔ انہوں نے پاکستان، بھارت، آسٹریلیا اور افغانستان کو ممکنہ سیمی فائنلسٹ ٹیمیں قرار دیا۔ سابق کپتان سرفراز کا کہناہے کہ اگر مجھے 4سیمی فائنلسٹ چننے ہیں، تو میں اس وقت پاکستان، بھارت، آسٹریلیا اور افغانستان میرا انتخاب ہو گالیکن میں کسی بھی ٹیم کو نظرانداز نہیں کرونگا۔
سرفراز احمد نے اعتراف کیا کہ پاکستان پر اپنے ہوم گراؤنڈ پر کھیلنے کا پریشر ضرور ہوگا، کیونکہ وہ دفاعی چیمپئن ہیں اور مداحوں کی توقعات ان سے بہت زیادہ ہوں گی۔ سابق کپتان نے افغانستان کو ایک خطرناک ٹیم قرار دیا جو ٹورنامنٹ میں اہم کردار ادا کر سکتی ہے۔2017 کی چیمپئنز ٹرافی جیتنے والے پاکستانی اسکواڈ میں سے صرف 3 کھلاڑی اس وقت پاکستانی ٹیم میں موجود ہیں لیکن سرفراز احمد نے پاکستان کے ٹائٹل جیتنے کے امکانات پر اعتماد کا اظہار کیا۔
سرفراز کا کہنا تھا کہ پاکستان کے پاس ٹائٹل کا دفاع کرنے کا بہت اچھا موقع ہے۔ ٹیم مضبوط نظر آ رہی ہے اور 2017 کے کچھ کھلاڑی اب بھی موجود ہیں، جن میں سب سے اہم بابر اعظم ہیں۔ سرفراز احمد نے پاکستان کی بولنگ کی بھی تعریف کی، خاص طور پر شاہین آفریدی اور حارث رؤف کو دنیا کے بہترین بولرز میں شمار کیا۔ واضح رہے کہ آئی سی سی نے پاکستان کے سابق کپتان سرفراز احمدکو چیمپئنز ٹرافی کا سفیر مقرر کیا ہے۔
By 
