وزیراعظم شہباز شریف کی ہدایت پر نائب وزیراعظم اسحاق ڈار نے بیرون ملک پاکستانی سفارت خانوں کی کارکردگی بہتر بنانے کے لیے خصوصی ذیلی کمیٹی تشکیل دے دی ہے۔
رکن قومی اسمبلی بلال اظہر کیانی کو 8 رکنی ذیلی کمیٹی کا کوینیئر مقرر کردیا گیا ہے جس کا باضابطہ نوٹیفکیشن بھی جاری کردیا گیا ہے۔
ذیلی کمیٹی کا پہلا اجلاس جمعہ بلال اظہر کیانی کی زیر صدارت ہوگا۔ وزارت داخلہ، تجارت، خزانہ اور اطلاعات و نشریات کے ایڈیشنل سیکرٹریز ذیلی کمیٹی کے ارکان کی حیثیت سے خدمات انجام دیں گے۔
کابینہ ڈویژن کے ادارہ جاتی اصلاحات سیل کے جوائنٹ سیکرٹریز کے ساتھ وزارت اوورسیز پاکستانیز اور وزارت خارجہ کے ایڈیشنل سیکرٹریز بھی ذیلی کمیٹی کا حصہ ہوں گے۔
ذیلی کمیٹی پاکستانی سفارت خانوں کو درپیش مجموعی کارکردگی، ڈھانچے اور چیلنجز کا جائزہ لے گی۔ یہ کمیٹی پاکستانی سفیروں کو انفرادی طور پر طلب کرے گی اور ان کی رائے اور تجاویز حاصل کرے گی۔ کمیٹی پاکستانی سفارت خانوں کی سیاسی اور معاشی کوششوں کا بھی جائزہ لے گی۔
مزید یہ کہ ذیلی کمیٹی مختلف ممالک میں سفارت خانوں میں کام کی نوعیت اور عملے کی سطح کا جائزہ لے گی۔ یہ سفارتخانے کی کارکردگی کو بہتر بنانے کے لیے اقدامات بھی تجویز کرے گی اور موجودہ حالات کے مطابق اصلاحات کی سفارش کرے گی۔ کمیٹی پاکستان کی اسٹریٹجک ضروریات کی بنیاد پر سفارت خانوں کے لیے قومی مقاصد اور اہداف کا تعین کرے گی۔
نوٹیفکیشن کے مطابق ذیلی کمیٹی پاکستانی سفارت خانوں اور سفارتکاروں کی کارکردگی کا جائزہ لینے کے لیے طریقہ کار بھی تجویز کرے گی۔ وہ اپنی ذمہ داریوں کو مؤثر طریقے سے نبھانے کے لیے ماہرین یا سفارتی شخصیات سے مدد لے سکتا ہے۔
بیرون ملک تعینات پاکستانی سفیروں کو ہدایت کی گئی ہے کہ وہ ذیلی کمیٹی کو مکمل تعاون فراہم کریں۔
By 
