پنجاب حکومت نے صوبے کے 30 لاکھ مستحق خاندانوں کے لیے بڑے ریلیف پیکج کا اعلان کیا۔
حکومت پنجاب کے منصوبے کے تحت 25 فروری سے ہر مستحق فرد کو 10 ہزار روپے کی مالی امداد فراہم کی جائے گی۔ یہ رقم بینک پے آرڈرز کے ذریعے تقسیم کی جائے گی، جس کے لیے بنک آف پنجاب اور پاکستان پوسٹ آفس کے درمیان ایک منظم نظام قائم کیا گیا ہے۔
بنک آف پنجاب روزانہ 5 لاکھ بینک پے آرڈرز انشورڈ لیٹرز کی صورت میں پاکستان پوسٹ آفس کو فراہم کرے گا، جس کے بعد پاکستان پوسٹ کی ٹیم پنجاب بھر میں یہ رقم مستحقین تک پہنچائے گی۔ اس سلسلے میں محکمہ ڈاک کے ڈائریکٹر جنرل سمیع اللہ خان نے تمام تیاریاں مکمل کر لی ہیں، جس میں بکنگ، پراسیسنگ، اور خصوصی ترسیل کے انتظامات شامل ہیں۔
اس منصوبے کی تکمیل تک پنجاب کے تمام ڈاکخانوں کے عملے کی چھٹیوں اور تبادلوں پر پابندی لگا دی گئی ہے۔ ملازمین کو صبح ساڑھے آٹھ بجے سے کام شروع کرنا ہوگا، جبکہ چھٹی کا کوئی مقررہ وقت نہیں ہوگا۔ ہفتہ و اتوار سمیت تمام چھٹیاں بھی معطل کر دی گئی ہیں اور منصوبے کی تکمیل تک 24 گھنٹے کام جاری رہے گا۔
بنک آف پنجاب پاکستان پوسٹ کے فراہم کردہ ’سکین شدہ ای بارکوڈز‘ کو لفافوں پر چسپاں کرے گاتاکہ تیار شدہ لفافے مستحق افراد کی فہرست کے مطابق وقت پر تقسیم کیے جا سکیں۔ ہر آرٹیکل کی ترسیل کے بعد پروف آف ڈیلیوری (POD) حاصل کیا جائے گا۔
اگر کوئی پوسٹ آفس اہلکار جعلی ترسیلی ریمارکس دیتا پایا گیا تو اس کے خلاف سخت تادیبی کارروائی کی جائے گی۔ منصوبے میں بہترین کارکردگی دکھانے والے افسران اور اہلکاروں کو پرکشش اعزازیہ سے نوازا جائے گا۔
By 
