متحدہ عرب امارات کی ریاست دبئی میں رہائشیوں کے لیے ویزا کی تجدید اب گھر بیٹھے چند منٹوں میں اور اپنے فون سے چند کلکس میں ممکن ہوگئی ہے۔
حکومت دبئی نے رہائشی ویزا کی تجدید کو مزید آسان اور تیز رفتار بنانے کے لیے ایک نئے ڈیجیٹل نظام کا آغاز کیا ہے۔جنرل ڈائریکٹوریٹ آف ریزیڈنسی اینڈ فارنرز افیئرز (جی ڈی آر ایف اے) نے ’سلامہ‘ کے نام سے ایک جدید آن لائن پلیٹ فارم متعارف کرایا ہے، جو مصنوعی ذہانت (AI) پر مبنی ہے۔
یہ پلیٹ فارم رہائشیوں کو اپنے اور اہل خانہ کے ویزوں کی تجدید میں بے مثال سہولت فراہم کرے گا۔جی ڈی آر ایف اے کے ہیڈکوارٹر الجفیلیہ میں منعقدہ چوتھے سالانہ میڈیا کونسل کے دوران اس نئے نظام کا اعلان کیا گیا۔ دبئی امیگریشن کے سربراہ لیفٹیننٹ جنرل محمد احمد المری نے اس منصوبے کو دبئی کی ڈیجیٹل تبدیلی کی جانب ایک اہم پیش رفت قرار دیا، جو شہریوں اور رہائشیوں کی زندگی کو مزید بہتر بنانے کے لیے شروع کیا گیا ہے۔
’سلامہ‘ پلیٹ فارم کے ذریعے رہائشی اپنے اور اہل خانہ کے ویزوں کی تجدید صرف چند منٹوں میں کروا سکیں گے۔ صارفین کو بس لاگ ان کرکے تجدید کی مدت منتخب کرنی ہوگی، فیس ادا کرنی ہوگی اور اپ ڈیٹ شدہ دستاویزات ڈاؤن لوڈ کرنی ہوں گی۔ اس پورے عمل میں کسی کاغذی کارروائی یا لمبی قطار میں کھڑے ہونے کی ضرورت نہیں ہوگی۔
اس کے علاوہ ’سلامہ‘ پلیٹ فارم صارفین کو ویزا کی مدت ختم ہونے سے پہلے نوٹیفیکیشن بھیجے گا، جس سے وہ اپنے اور اہل خانہ کے ویزوں کی تجدید بروقت کروا سکیں گے۔ دبئی امیگریشن کے اسسٹنٹ ڈائریکٹر جنرل برائے ڈیجیٹل سروسز کرنل خالد الفلاسی نے کہا کہ ’سلامہ‘ جدید ٹیکنالوجی کے ذریعے فوری اور درست جوابات فراہم کرتا ہے، جس سے حکومتی خدمات کو مزید بہتر بنانے میں مدد ملے گی۔
By 
