صدر آصف زرداری نے وفاقی کابینہ میں شامل ہونے والے نئے وزرا سے حلف لے لیا۔
ایوان صدر میں حلف برداری تقریب منعقد کی گئی جس میں صدر مملکت آصف زرداری نے وفاقی کابینہ میں شامل ہونے والے نئے وزرا سے حلف لیا۔
تقریب میں وزیراعظم شہباز شریف و دیگر وفاقی وزرا ء نے شرکت کی۔ وفاقی کابینہ میں مزید 13وزراء اور 11وزرائے مملکت کی شمولیت ہوئی ہے، تین مشیر بھی وفاقی کابینہ کے حصہ ہوں گے، جس کے بعد وفاقی کابینہ کی مجموعی تعداد 46ہوگئی ہے۔
حلف اٹھانے والے وفاقی وزرا میں حنیف عباسی، ڈاکٹر طارق فضل چوہدری، معین وٹو، مصطفیٰ کمال، سردار یوسف، علی پرویز، شزہ فاطمہ، جنید انور، خالد مگسی، پیر عمران شاہ، اورنگزیب کھچی، رانا مبشر، رضا حیات ہراج شامل ہیں۔
حلف اٹھانے والے وزرائے مملکت میں بیرسٹر عقیل ملک، ملک رشید، ارمغان سبحانی، طلال چوہدری، کھیئل داس، رحمان کانجو، بلال کیانی، مختار بھرت، شذرہ منصب، انور چوہدری، وجیہہ قمر شامل ہیں۔
محمد علی، توقیر شاہ اور پرویز خٹک وزیراعظم کے مشیر ہوں گے، اس وقت کابینہ ارکان کی تعداد 21 ہے مزید 25 ارکان شامل کیے گئے ہیں، شزا فاطمہ اور علی پرویز ملک کو وزیر مملکت سے وفاقی وزیر بنایا گیا ہے۔
By 
