رمضان المبارک کے آغاز پر ملک بھر میں بارشوں اور برفباری کی پیشگوئی کردی گئی۔
محکمہ موسمیات نے خبردار کیا کہ رمضان المبارک کے آغاز پر ملک بھر میں موسمی حالات تبدیل ہوں گے اور شدید بارشوں کے ساتھ ساتھ پہاڑی علاقوں میں برف باری کا سلسلہ شروع ہوجائے گا۔ آج اور کل ملک کے بیشتر حصوں میں موسلادھار بارش اور پہاڑوں پر برف باری متوقع ہے۔
پنجاب میں آج اور کل بادل کھل کر برسیں گے جبکہ خیبرپختونخوا کے میدانی علاقوں میں بارش اور پہاڑی علاقوں میں برف باری کا سلسلہ 4 مارچ تک جاری رہے گا۔ محکمہ موسمیات نے تمام اضلاع کی انتظامیہ کو موسمی تبدیلیوں کے پیشِ نظر ہدایات جاری کردی ہیں۔ مری، گلیات اور دیگر پہاڑی علاقوں میں بھی بارش اور برف باری کا امکان ہے۔
علاوہ ازیں محکمہ موسمیات نے بتایا ہے کہ آج سے ایک طاقتور مغربی موسمی سسٹم بلوچستان میں داخل ہونے والا ہے، جس کے تحت گرج چمک کے ساتھ بارش، آندھی اور پہاڑی علاقوں میں برف باری کا امکان ہے۔
پی ڈی ایم اے نے عوام کو ہدایت کی ہے کہ برف باری، طوفان اور سیلاب کے دوران غیر ضروری سفر سے گریز کریں۔ خاص طور پر سیاحوں اور مسافروں کو احتیاطی تدابیر اختیار کرنے کی تاکید کی گئی ہے۔
موسمی تبدیلیوں کے پیشِ نظر محکمہ موسمیات نے عوام کو خبردار کیا کہ وہ موسمی حالات پر نظر رکھیں اور احتیاطی تدابیر اختیار کریں۔
By 
