رواں برس صدقہ فطر ،فدیے کی کم ازکم مقدار240روپے فی کس ہے : مفتی منیب الرحمٰن

معروف مذہبی اسکالر و سابق چیئرمین رویت ہلال کمیٹی مفتی منیب الرحمٰن نے کہا ہے کہ رواں برس صدقہ فطر اورفدیے کی کم ازکم مقدار240روپے فی کس مقرر ہے۔

کراچی سے جاری کئے گئے اپنے ایک بیان میں مفتی منیب الرحمان کا کہنا تھا کہ صاحب ثروت لوگ اپنی مالی حیثیت کے مطابق فطرہ ، فدیہ اور کفارہ کی رقم ادا کریں۔

یہ بھی پڑھیں:18ویں ترمیم کے بعد میرے پاس اختیار نہیں : گورنر سندھ کامران خان ٹیسوری

انہوں نے فطرہ ،فدیہ صوم اور کفارہ صوم سے متعلق بتایا کہ گندم کے آٹے کا فدیہ 240 روپے ،جَو کے لحاظ سے فدیہ 700روپے جبکہ عمدہ کھجور کے لحاظ سے فدیہ 4000 روپے ہے۔

مفتی منیب الرحمان نے بتایاکہ عمدہ کشمش کے حساب سے فدیہ 6400روپے ہے جبکہ روزہ توڑنے کا کفارہ 60مساکین کو دو وقت کا کھانا کھلانا ہے۔

مفتی منیب الرحمان کا کہنا ہے کہ فدیہ دائمی مریض یا ایسے انتہائی ضعیف العمر افراد کیلئے ہے، عارضی مریض یا مسافر جو مرض یا سفر کے عذر کی بناء پر روزہ نہ رکھیں، ان پر صحت یاب ہونے یا سفر سے واپسی پر اپنی سہولت کے مطابق قضا ہے۔

یہ بھی پڑھیں:پی آئی اے کا کینیڈا اور پیرس کیلئے کرایوں میں بڑی کمی کا اعلان

مفتی منیب الر حمٰن نے مزید کہا کہ فدیہ اس کا بدل نہیں ہے جو شخص روزہ رکھ کر کسی عذر کے بغیر توڑ دے، اس پر کفارہ ایک روزے کی قضا ہے اور اگر کوئی روزہ رکھنے پر قدرت نہ رکھتا ہو تو پھر مالی کفارہ ہے۔