وزیراعظم شہباز شریف کا 190 ملین پاؤنڈ این سی اے فنڈز سے اسلام آباد میں دانش یونیورسٹی کے قیام کا حکم

وزیراعظم محمد شہباز شریف نے برطانیہ کی نیشنل کرائم ایجنسی (این سی اے) سے سپریم کورٹ آف پاکستان کے اکاؤنٹ میں منتقل ہونے والی 190 ملین پاؤنڈز سے اسلام آباد میں دانش یونیورسٹی آف اپلائیڈ اینڈ ایمرجنگ سائنسز بنانے کا اعلان کیا ہے۔

یہ بھی پڑھیں:وزیراعظم کا ملک ریاض سے ملنے والے 190ملین پائونڈز سے دانش یونیورسٹی آف ایمرجنگ ٹیکنالوجی بنانے کا فیصلہ

ڈانش یونیورسٹی آف اپلائیڈ اینڈ ایمرجنگ سائنسز کے قیام سے متعلق اسٹیئرنگ کمیٹی کے اجلاس کی صدارت کرتے ہوئے وزیراعظم نے 190 ملین پاؤنڈ کی رقم وفاقی حکومت کے اکاؤنٹ میں آسانی سے منتقل کرنے کو یقینی بنانے پر چیف جسٹس آف پاکستان کا شکریہ ادا کیا۔

برطانیہ کی نیشنل کرائم ایجنسی (این سی اے) نے 190 ملین پاؤنڈ پاکستان کو واپس کیے تھے جو سپریم کورٹ سے وفاقی حکومت کے اکاؤنٹ میں منتقل کردیے گئے ہیں۔ وزیر اعظم شہباز شریف کے ویژن کے مطابق یہ رقم جدید ترین دانش یونیورسٹی کی تعمیر کے لیے استعمال کی جائے گی۔

مزید پڑھیں:کیا عمران خان کو 190 ملین پاؤنڈکیس میں ریلیف مل سکتا ہے ؟سینئر صحافی زاہد گشگوری نے بتادیا

اس موقع پر خطاب کرتے ہوئے وزیراعظم نے کہا کہ دانش یونیورسٹی ایک ایسا ادارہ ہوگا جہاں مستحق اور باصلاحیت طلبا اعلیٰ معیار کی تحقیق پر مبنی تعلیم حاصل کریں گے۔ انہوں نے یونیورسٹی کے لیے اسلام آباد میں اراضی کے حصول کے لیے قانونی کارروائیاں جلد مکمل کرنے کی ہدایت کی۔

وزیر اعظم نے یونیورسٹی کے چارٹر اور دیگر قانونی معاملات کو فوری طور پر حتمی شکل دینے کی بھی ہدایت کی۔ مزید برآں انہوں نے اس بات پر زور دیا کہ دانش یونیورسٹی کو بین الاقوامی معیار کی ٹیکنیکل اور اپلائیڈ سائنسز یونیورسٹی کے طور پر ترقی دی جائے۔

انہوں نے مزید ہدایت کی کہ یونیورسٹی کا فن تعمیر سادگی کی عکاسی کرے، عمارتیں سرخ اینٹوں سے تعمیر کی جائیں اور اخراجات کو کم سے کم کرنے کے لیے غیر ضروری اخراجات سے گریز کیا جائے۔ انہوں نے یونیورسٹی کے لیے اعلیٰ تعلیم یافتہ فیکلٹی اور اساتذہ بھرتی کرنے کی بھی ہدایت کی جو جدید ترین ٹیکنالوجی اور جدید تحقیقی سہولیات سے آراستہ ہوں گے۔

یہ بھی پڑھیں: 190 ملین پاؤنڈ کیس میں عمران حکومت کے ملوث ہونے کا انکشاف، خفیہ دستاویز سامنے آگئی

وزیراعظم نے کہا کہ یونیورسٹی کا نصاب بین الاقوامی معیار کے مطابق تیار کیا جائے۔ انہوں نے وائس چانسلر کی تقرری کے لیے کمیٹی اور بورڈ آف ٹرسٹیز کی نامزدگی کے لیے ایک کمیٹی تشکیل دینے کی بھی ہدایت کی۔

اجلاس کے دوران دانش یونیورسٹی اور دانش اسکولز کے حوالے سے بریفنگ دی گئی اور اس بات پر روشنی ڈالی گئی کہ وزیراعظم دانش یونیورسٹی کے سرپرست ہوں گے جو سیکشن 42 کمپنی کے طور پر رجسٹرڈ ہوگی اور تمام ضروری رسمی کارروائیاں چند روز میں مکمل کی جائیں گی۔

سیکٹر ایچ 16 میں یونیورسٹی کی زمین کا انتخاب کیا گیا ہے۔ مالی خود مختاری اور کم سے کم حکومتی مداخلت کو یقینی بنانے کے لیے دانش یونیورسٹی دانش ٹرسٹ کے تحت کام کرے گی۔ مزید برآں یہ اعلان بھی کیا گیا کہ جلد ہی شگر، گلگت اور باغ کے علاوہ وادی نیلم اور کراچی کے پسماندہ علاقوں میں دانش اسکول قائم کیے جائیں گے۔ اجلاس میں وزیر منصوبہ بندی احسن اقبال، وزیر اقتصادی امور احد خان چیمہ، وزیر تعلیم و پیشہ ورانہ تربیت ڈاکٹر خالد مقبول صدیقی، وزیر اطلاعات و نشریات عطاء اللہ تارڑ اور سینئر سرکاری حکام نے شرکت کی۔