پاکستان تحریک انصاف (پی ٹی آئی) کے بانی چیئرمین عمران خان نے اسلام آباد ہائیکورٹ میں 3 ججز کا تبادلہ چیلنج کر دیا ہے۔
جمعرات کو بانی چیئرمین پاکستان تحریک انصاف عمران خان نے اسلام آباد ہائیکورٹ میں آئینی درخواست جمع کرواتے ہوئے مؤقف اختیار کیا کہ ججز کی تعیناتی غیرآئینی ہے، تینوں ججز کا اسلام آباد ہائیکورٹ میں تبادلہ کالعدم قرار دیا جائے۔
بانی چیئرمین پی ٹی آئی کی درخواست میں استدعا کی گئی ہے کہ عدالت الجہاد ٹرسٹ کیس کے تناظر میں شفافیت یقینی بنانے کا حکم دے، عدالت قرار دے کے آرٹیکل 200 کا استعمال مفصل مشاورت سے ہی ممکن ہے۔
درخواست میں مزید استدعا کی گئی ہے کہ اسلام آباد ہائیکورٹ کے پہلے سے موجود ججز کو انتقام کا نشانہ بنایا جارہا ہے، اسلام آباد ہائیکورٹ کے ججز نے مداخلت کے خلاف آواز اٹھائی تھی کیونکہ اسلام آباد ہائیکورٹ کے ججز نے میرے خلاف مقدمات میرٹ پرنمٹائے تھے۔
درخواست میں مؤقف اختیار کیا گیا ہے کہ بغیر حلف اٹھائے ایک جج کو لا کر قائمقام چیف جسٹس بنایا گیا، یہ سارے طریقے عدلیہ کی آزادی ختم کرنے کے لیے آزمائے جا رہے ہیں۔
By 
