پاکستان کرکٹ بورڈ نے چیمپئنز ٹرافی میں مالی نقصان کے حوالے سے سوشل میڈیا پر چلنے والی خبروں کی تردید کر دی۔
پاکستان کرکٹ بورڈ کے ذرائع کا کہنا ہے کہ آئی سی سی فنانشل اینڈ کمرشل افئیرز کمیٹی نے چیمپئنز ٹرافی کے ایونٹ آپریشنز کے اخراجات کے طور پر 70 ملین ڈالرز کی منظوری دی تھی۔ پی سی بی کا کہنا ہے کہ ایونٹ آپریشنز کے اخراجات میں کھلاڑیوں و اہلکاروں کی لاجسٹکس، رہائش، فیس، انعامی رقم، نشریات و پروڈکشن وغیرہ شامل ہیں۔
پی سی بی ذرائع نے بتایا کہ پی سی بی کو 6 ملین ڈالرز کی میزبانی کی فیس وصول ہوئی ہے۔ اس کے علاوہ پاکستان کو گیٹ منی اور مہمان نواز سے ہونیوالی کمائیاں ابھی ملنی ہیں۔ تمام چیمپئنز ٹرافی آپریشنل اخراجات ایونٹ بجٹ سے پورے کیے گئے، پی سی بی کی میزبان فیس سے کوئی پیسہ خرچ نہیں کیا گیا۔
بورڈ کی جانب سے کہا گیا کہ انفراسٹرکچر بہتر کرنے یا دوبارہ سے بنانے کیلئے اخراجات ہمیشہ میزبان کے ذمہ ہوتے ہیں۔ احمد آباد اسٹیڈیم کو آئی سی سی ورلڈ کپ 2023 کے آپریشنل اخراجات سے نہیں بنایا گیا تھا۔ پی سی بی نے مزید کہا کہ اسٹیڈیم بنانا مستقبل کیلئے ایک سرمایہ کاری تھی، جس طرح فیفا ورلڈ کپ اور اولمپکس میں بھی نظر آتی ہے۔ عالمی ایونٹس کیلئے برانڈ نیو سہولیات تخلیق کی جاتی ہیں۔
واضح رہے کہ قذافی اسٹیڈیم اور نیشنل اسٹیڈیم کو 29 سال بعد آئی سی سی ایونٹس کیلئے اپ گریڈ کیا گیا تھا اور سٹیڈیم کی تعمیرات میں خرچہ پی سی بی بجٹ سے کیا گیا۔ اس بجٹ کی منظوری پی سی بی بورڈ آف ڈائریکٹرز نے دی تھی۔
By 
