ملک کے مختلف علاقوں میں بارش اور ژالہ باری کا امکان

ملک بھر میں رواں ہفتے دو مغربی ہوائی سسٹمز کے اثرات مرتب ہونے کا امکان ہے جس کے نتیجے میں مختلف علاقوں میں بارش اور ژالہ باری ہو سکتی ہے۔

ماہر موسمیات جواد میمن کے مطابق ان سسٹمز کی معتدل شدت کے باعث 13 اپریل تک شمالی علاقوں میں گرج چمک کے ساتھ بارش کا امکان ہے، جب کہ پنجاب کے مختلف علاقوں میں 12 اپریل تک آندھی اور گرج چمک کے ساتھ بارش ہو سکتی ہے۔ میدانی علاقوں میں بھی آندھی کے ساتھ بارش کی توقع ہے۔

مزید پڑھیں: تعلیمی اداروں میں جلد موسم گرما کی تعطیلات کا امکان

بلوچستان کے چند مقامات پر 11 اپریل کو بارش کی پیش گوئی کی جا رہی ہے، خاص طور پر کوئٹہ، ژوب، زیارت، پشین اور قلعہ سیف اللہ میں درمیانی شدت کی بارش کا امکان ہے۔

اس کے علاوہ ماہر موسمیات نے بتایا کہ آئندہ دنوں میں بالائی اور وسطی سندھ میں درجہ حرارت 44 سے 47 ڈگری سینٹی گریڈ تک پہنچ سکتا ہے، جس سے سکھر، جیکب آباد، لاڑکانہ اور دیگر میدانی علاقوں میں شدید گرمی کی توقع ہے۔

جواد میمن نے مزید کہا کہ کراچی سمیت سندھ کی ساحلی پٹی پر 10 سے 12 اپریل تک گرج چمک کے بادلوں کی تشکیل کا امکان ہے۔ شہر قائد کے مضافات میں جمعرات اور جمعے کو مقامی سطح پر گرج چمک کے بادل بن سکتے ہیں اور نم ہواؤں اور گرمی کے باعث گڈاپ، ملیر اور سپرہائی وے کے اطراف بارش کی بھی توقع ہے۔