پاکستان سپر لیگ (پی ایس ایل) کی فرنچائز کراچی کنگز نے قومی ٹیم کے فاسٹ بولر حسن علی کو نائب کپتان مقرر کردیا۔
فرنچائز کی جانب سے جاری کئے گئےاعلامیے کے مطا بق پی ایس ایل کے دسویں سیزن میں حسن علی کراچی کنگز کی جانب سے نائب کپتان کی ذمہ داریاں سنبھالیں گے۔ گزشتہ ایڈیشن میں فاسٹ بولر نے 14 وکٹیں لے کر فرنچائز کے کامیاب ترین گیند باز بننے کا اعزاز حاصل کیا تھا۔
اس موقع پر فرنچائز کے اونر سلمان اقبال کا کہنا ہے کہ حسن علی میں وہ جذبہ ہے جو کنگز کی پہچان ہے، ہم یہ چاہتے ہیں کہ وہ کپتان ڈیوڈ وارنر کے ساتھ مل کر ٹیم کو اگلے درجے پر لے جائیں۔ کراچی کنگز نے حسن علی کو نائب کپتان بنانے کا اعلان اپنے تمام سوشل میڈیا پلیٹ فارمز پر کیا ۔
آج اسلام آباد میں ہونے والی کپتانوں کی پریس کانفرنس میں ڈیوڈ وارنر کی غیر موجودگی میں انہوں نے شرکت کی تھی۔ واضح رہے کہ کراچی کنگز اپنا پہلا میچ 12 اپریل کو نیشنل بینک اسٹیڈیم کراچی میں ملتان سلطانز کے خلاف کھیلے گی۔
By 
