مستونگ کے علاقے دشت روڈ پر کھنڈ مہسوری کے قریب بلوچستان کانسٹیبلری کے گاڑی کے قریب دھماکہ ہوا ہے جس کے نتیجے میں بی سی کے 3 اہلکار شہید جبکہ 16 زخمی ہیں ۔
پولیس حکام کے مطابق دھماکہ موٹرسائیکل میں نصب ریموٹ کنٹرول بارودی مواد سے کیا گیا، بلوچستان کانسٹیبلری کے اہلکار ڈیوٹی سے واپس جارہے تھے۔
واقعے کی اطلاع ملتے ہی فورسز کے اہلکار جائے وقوعہ پر پہنچ گئے اور شہید و زخمی ہونے والے اہلکاروں کو ہسپتال منتقل کردیا گیا ہے ۔
واقعے کے بعد بولان میڈیکل کالج ہسپتال اور سول ہسپتال کوئٹہ میں ایمرجنسی نافذ کر دی گئی ہے۔
صدر مملکت آصف علی زرداری اور وزیراعظم شہباز شریف نے مستونگ دھماکے کی مذمت کی اور اہلکاروں کی شہادت پر اظہار افسوس کیا جبکہ زخمیوں کو فوری طبی امداد فراہم کرنے کی ہدایت کی۔
شہباز شریف نے کہا کہ انسانیت کے دشمن دہشتگردوں کے مذموم عزائم کو خاک میں ملائیں گے، ملک سے دہشتگردی کے مکمل خاتمے تک جنگ جاری رہے گی۔
وزیراعلیٰ بلوچستان سرفراز بگٹی نے زخمیوں کو بہتر طبی امداد کی فراہمی کی ہدایت کردی ۔
وزیر اعلیٰ بلوچستان سرفراز بگٹی نے کہا کہ زخمیوں کے علاج معالجے میں کوئی غفلت برداشت نہیں کی جائیگی ، حکومت بلوچستان واقعے کی شدید مذمت کرتی ہے اور شہداء کے شانہ بشانہ کھڑی ہوگی ، واقعے میں ملوث عناصر کسی رعایت کے مستحق نہیں ہیں ۔
By 
