عمران خان کی بیرسٹرسیف کو اسٹیبلشمنٹ سے رابطے جاری رکھنے کی ہدایت

پاکستان تحریک انصاف کے بانی عمران خان سے اڈیالا جیل میں وزیراعلیٰ خیبرپختونخوا کے مشیر برائے اطلاعات بیرسٹرمحمد علی سیف کی ملاقات کی اندرونی کہانی سامنے آگئی۔

تفصیلات کے مطابق چند روز قبل مشیراطلاعات کے پی بیرسٹر محمد علی سیف کی بانی پی ٹی آئی سے ملاقات ہوئی تھی۔ اس حوالے سے میڈئا رپورٹس کے مطابق ملاقات میں اسٹیبلشمنٹ سے بات چیت پر اب تک کی پیش رفت پرگفتگو ہوئی اور بیرسٹرسیف نے بانی پی ٹی آئی کو اسٹیبلشمنٹ سے بات نہ بننےکی وجوہات بتائیں۔

میڈیا رپورٹس کے مطابق اسٹیبلشمنٹ کے ساتھ بات چیت کیلئے وفاقی حکومت کے ساتھ بیٹھک ضروری ہے۔ ملاقات کے دوران بانی پی ٹی آئی نے بیرسٹرسیف کو اسٹیبلشمنٹ سے رابطے جاری رکھنے کی ہدایت کی۔

میڈیا رپورٹس کے مطابق ملاقات میں بیرسٹرسیف پر سوشل میڈیا پر پارٹی رہنماؤں کے اعتراضات بھی زیربحث آئے تاہم عمران خان نے بیرسٹرسیف پراعتماد کا اظہار کیا اور کام جاری رکھنے کی ہدایت کی۔

ذرائع کے مطابق بیرسٹرسیف اور بانی پی ٹی آئی کی ملاقات میں دہشتگردی اور افغانستان کےساتھ بات چیت پر گفتگو ہوئی اور عمران خان نے امن و امان کےحوالے سے افغانستان سے مذاکرات ناگزیر قراردیے۔

نجی ٹی وی سے گفتگو میں مشیراطلاعات خیبرپختونخوا بیرسٹرمحمد علی سیف کا کہنا تھاکہ بانی پی ٹی آئی سے مختلف امور پر گفتگو ہوئی جس میں مذاکرات اور پارٹی کے معاملات زیربحث آئے۔