وزیر مملکت طلا ل چودھری نے کہا ہے کہ حکومتِ پاکستان نے تمام صوبوں کو آگاہ کیا ہے کہ آج کے دن سے اگر کوئی شخص کسی غیر قانونی فرد کو کرائے پر کوئی جگہ، دکان یا مکان دے گا تو وہ خود بھی ذمہ دار ٹھہرایا جائے گا۔
اسلام آباد میں پریس کانفرنس کرتے ہوئے وزیر مملکت طلال چودھری کا کہنا تھا کہ 30 اپریل کے بعد ویزے کے بغیر پاکستان میں نہیں رہ سکیں گے، 40 سال تک افغان بھائیوں کی دل کھول کر میزبانی کی، دنیا میں کوئی ملک ایسا نہیں جہاں بغیر ویزے کے رہا جائے۔
ان کاکہنا تھا کہ حکومتی فیصلے کے مطابق جس کے پاس قانونی دستاویزات ہوں، چاہے وہ کسی بھی ملک سے ہو، اُسی کو ملازمت دی جا سکتی ہے، ہوٹل میں کرائے پر قیام، کوئی کاروبار، دکان یا مکان، کسی قسم کی ملازمت، یا منقولہ و غیر منقولہ جائیداد سے متعلق معاملات صرف اُسی فرد کے ساتھ کیے جا سکتے ہیں جس کے پاس قانونی دستاویزات ہوں۔
حکومتی فیصلے میں طے کیا گیا ہے کہ پاکستانی شہری صرف ایسے افراد کے ساتھ کام کر سکتے ہیں جن کے پاس درست قانونی کاغذات موجود ہوں۔
طلال چودھری نے کہا ہے کہ غیرقانونی غیر ملکیوں کے انخلاء کی تاریخ میں توسیع نہیں ہوگی۔
By 
