نائب وزیر اعظم متحدہ عرب امارات شیخ عبداللہ بن زید النہیان آج پاکستان پہنچ رہے ہیں، دفتر خارجہ

 متحدہ عرب امارات (یو اے ای) کے نائب وزیر اعظم اور وزیر خارجہ شیخ عبداللہ بن زید النہیان 20 سے 21 اپریل 2025 تک 2 روزہ پاکستان کے سرکاری دورہ پر آج پاکستان پہنچ رہے ہیں۔

پاکستان کے دفتر خارجہ کی جانب سے جاری بیان میں کہا گیا ہے  ان کا اعلیٰ سطح کا دورہ، پاکستان اور متحدہ عرب امارات کے درمیان گہرے اور برادرانہ تعلقات اور باہمی دلچسپی کے تمام شعبوں میں دوطرفہ تعاون کو مضبوط بنانے کے لیے دونوں ممالک کے مشترکہ عزم کی عکاسی کرتا ہے۔

یہ بھی پڑھیں:متحدہ عرب امارات نے درہم اور ڈیجیٹل کرنسی کا نیا لوگو جاری کر دیا

بیان کے مطابق اپنے دورے کے دوران شیخ عبداللہ بن زید النہیان پاکستان کے نائب وزیراعظم اور وزیر خارجہ اسحاق ڈار سے ملاقات کریں گے۔ ملاقات کے دوران دوطرفہ تعلقات کے تمام پہلوؤں کا جائزہ لیا جائے گا جن میں تجارت اور سرمایہ کاری، توانائی تعاون، علاقائی سلامتی اور عوامی رابطوں پر خصوصی توجہ دی جائے گی۔

یہ دورہ دونوں فریقین کے درمیان باہمی دلچسپی اور علاقائی اور عالمی صورت حال پر تبادلہ خیال کرنے کا موقع بھی فراہم کرے گا۔ نائب وزرائے اعظم اسحاق ڈار کی اپنے ہم منصب سے آخری ملاقات 21 فروری 2025 کو ابوظہبی میں ہوئی تھی۔

دفتر خارجہ کے مطابق شیخ عبداللہ پاکستان کے وزیر اعظم محمد شہباز شریف سے بھی ملاقات کریں گے۔ یہ ملاقات خطے میں امن اور خوشحالی کے مشترکہ وژن کی توثیق کرے گی۔

بیان کے مطابق شیخ عبداللہ بن زاید النہیان کے دورے سے پاکستان اور متحدہ عرب امارات کے دیرینہ تعلقات مزید مستحکم ہوں گے اور دونوں ممالک کے عوام کے مفاد میں مختلف شعبوں میں دوطرفہ تعلقات کو مزید گہرا کرنے میں مدد ملے گی۔