ہنی ٹریپ سے شہریوں کو لوٹنے والے 2 بڑے گینگز گرفتار، بھاری رقم اور اسلحہ برآمد

راولپنڈی پولیس لائنز میں ایس ایس پی آپریشنز نے بتایا ہے کہ ہنی ٹریپ سے شہریوں کو لوٹنے والے 2 بڑے گینگز کو گرفتار کرتے ہوئے ان سے شہریوں سے لوٹی ہوئی رقم اور اسلحہ برآمد کر لیا ہے۔

منگل کو راولپنڈی میں پریس کانفرنس سے خطاب کرتے ہوئے پولیس لائنز میں ایس ایس پی آپریشنز نے بتایا کہ دونوں گینگز کو صدربیرونی اور صادق آباد پولیس نے گرفتار کیا ہے، دونوں گینگز ہنی ٹریپ کے ذریعے شہریوں کو لوٹنے میں ملوث ہیں، دونوں گینگز کے کل 16ملزمان کو گرفتار کیا گیاہے۔

ایس ایس پی کے مطابق گینگز میں پاکستانی نژاد خاتون، پولیس اہلکار اور دیگر ارکان شامل ہیں، دونوں گینگز سے 7لاکھ50ہزار روپے  اور اسلحہ برآمد کیا گیا ہے جبکہ گینگز سے تفتیش میں مزید انکشافات اور ریکوری بھی متوقع ہے، دونوں گینگز کے ارکان سوشل میڈیا کے ذریعے شہریوں کو ٹریپ کر کے ان کو لوٹتے رہے ہیں۔

انہوں نے بتایا کہ صدر بیرونی پولیس نے پاکستانی نژاد مشرقی افریقن خاتون سمیت 6 افراد کو گرفتار کیا ہے، گینگ کی لیڈی سرغنہ مرینہ خان پاکستانی نژاد (مشرقی افریقن) ملاوی ہے، گینگ میں سرغنہ مرینہ خان کا شوہر بلال اور دیگر ارکان فاروق، طیب، کامران اور عبدالجبار بھی شامل ہیں۔

ایس ایس پی آپریشنز نے بتایا کہ مرینہ خان گینگ سے 02 لاکھ 50ہزارروپے اور اسلحہ برآمدہوا، مرینہ خان سوشل میڈیا پلیٹ فارمز پر شہریوں سے رابطہ کر کے ملاقات کے لیے بلاتی اور پھر گینگ ممبران اسلحہ کی نوک پر اس سے رقم اور قیمتی اشیا چھین لیتے، مرینہ خان گینگ نے متعدد وارداتوں کا بھی انکشاف کیا ہے۔

ایس ایس پی آپریشنز نے مزید بتایا کہ صادق آباد پولیس نے10رکنی آفتاب عرف تابی گینگ کو گرفتار کیا ہے، آفتاب عرف تابی گینگ سے5لاکھ روپے اور اسلحہ برآمد ہوا، آفتاب عرف تابی گینگ کا سرغنہ ہے جس نے خواتین، دیگر ساتھیوں اور پولیس اہلکاروں کے ساتھ مل کر گینگ بنا رکھا تھا۔

انہوں نے بتایا کہ گرفتار ملزمان میں آفتاب، حمزہ،شان، ہاجرہ،عظمیٰ، مبشر،رضاعباس،فضل عباس،نعمان اور افضال شام ہیں، ہاجرہ مخصوص سوشل میڈیا ایپ کے ذریعے شہریوں کو ٹریپ کرتی تھی، شہری کو ملنے کے بہانے بلایا جاتا تھا اور ان کی نازیبا ویڈیوز، تصاویر بنا کر بلیک میل کیا جاتا تھا۔

انہوں نے بتایا کہ گینگ جڑواں شہروں کے شہریوں کو ہنی ٹریپ کے ذریعے بلیک میل کر کے لوٹنے کی متعدد وارداتوں میں ملوث تھے، گینگ میں شامل پولیس اہلکار گینگ کے دیگر ممبران کی پشت پناہی کرتے اور شہریوں کو بلیک میل کرنے میں ان کا ساتھ دیتے رہے ہیں۔