وزیراعلیٰ پنجاب مریم نواز نے کہا ہے کہ سرحدوں پر تنائو ہے، ہمیں جلائو گھیرائو والوں کیساتھ نہیں، ہم سیسہ پلائی دیوار کی طرح افواج پاکستان کیساتھ کھڑے ہیں۔ پاک فوج نے وطن عزیز کی خاطر بہت قربانیاں دی ہیں۔
وزیراعلیٰ پنجاب مریم نواز نے لاہور میں لیپ ٹاپ تقسیم کی تقریب سے خطاب کرتے ہوئے کہا کہ مالی حالات کی وجہ سے کوئی بچہ پڑھ نہ سکے تو دکھ ہوتا ہے، صرف پنجاب کا نہیں پورے پاکستان کا مستقبل روشن ہے، لیپ ٹاپ اسکیم میں بچیوں کا حصہ زیادہ رکھا گیا ہے۔
مریم نواز نے کہا کہ لیپ ٹاپ بغیر ایک بھی میرٹ کے نہیں دیا گیا، ہرسال ایک لاکھ لیپ ٹاپس تقسیم کیے جائیں گے۔ میں آپکی ماں کی طرح ہوں، تمام خواب پورے کروں گی۔ اسکالرشپ 30 ہزار روپے سے بڑھا کر 50 ہزار روپے کر دی ہے۔
وزیراعلیٰ نے طلبہ سے خطاب میں مزید کہا کہ سرحدوں پر ہم سب افواج پاکستان کیساتھ کھڑے ہیں۔ ہمیں جلائوگھیرائو کرنیوالوں کا ساتھ نہیں دینا ہے، بارڈر پر تنائو ہے مگر بچو آپ آنے ڈرنا نہیں ہے۔ پاک فوج نے وطن عزیز کی خاطر بہت قربانیاں دی ہیں۔
انہوں نے مزید کہا کہ اگر کوئی آپکو کہے کہ پیٹرول بم سے اس کا سر پھوڑ دو تو آپ نے کسی کے بہکاوے میں نہیں آنا، کوئی کہے کہ وردی والے پر گولی چلائو تو اس کے بہکاوے میں نہیں آنا۔ جو بہکاوے میں آئے وہ آج جیلوں میں سڑ رہے ہیں۔ آپکا تعلق خواہ کسی بھی سیاسی جماعت سے ہو، آپکا ہر قدم ملک کی بھلائی کی خاطر اٹھنا چاہئے۔
By 
