پاکستان کسی بھی بھارتی اقدام کا فیصلہ کن جواب دے گا، قومی اسمبلی میں قرارداد منظور

پاکستان کسی بھی بھارتی اقدام کا فیصلہ کن جواب دے گا، قومی اسمبلی میں قرارداد منظورکر لی گئی۔

نجی ٹی وی کے مطابق قومی اسمبلی کا اجلاس اسپیکر کی صدارت میں ہوا۔ اس موقع پر اسپیکر قومی اسمبلی نے کہا کہ پاکستان نے بار بار آزادانہ انکوائری کا مطالبہ کیا، پاکستان سے زیادہ دہشت گردی کے نقصان سے کون واقف ہے۔

پہلگام واقعے پر بحث کرانے کیلئے ایوان میں تحریک پیش کی گئی تو اس دوران قومی اسمبلی میں معمول کی کارروائی معطل کردی گئی۔ تحریک وزیر قانون اعظم نذیر تارڑ کی جانب سے پیش کی گئی۔

پاکستان کی خودمختاری کو چیلنج کیا گیا تو بھرپور طاقت سے جواب دیں گے، آرمی چیف

بعد ازاں پہلگام واقعے کے بعد بھارت کی آبی جارحیت کے خلاف قرارداد قومی اسمبلی میں پیش کی گئی۔ یہ قرارداد وفاقی وزیر پارلیمانی امور طارق فضل چوہدری نے پیش کی جسے متفقہ طور پر منظور کرلیا گیا۔

قرارداد کے متن میں کہا گیا کہ قومی اسمبلی ہر قسم کی دہشت گردی کی مذمت کرتی ہے، پاکستان بھارتی الزامات کو مسترد کرتا ہے، پاکستان کسی بھی بھارتی اقدام کا فیصلہ کن جواب دے گا اور پاکستان اپنی خودمختاری کا مکمل دفاع کرے گا۔

قرارداد میں مزید  کہا گیا کہ پاکستان کشمیری عوام کی غیر متزلزل حمایت جاری رکھے گا،  کشمیری اپنے حق خودارادیت کی جنگ لڑ رہے ہیں، یہ پاکستان کا معاملہ ہے ہم سب پاکستانی ہیں، ہم اس قرارداد کی بھرپور حمایت کرتے ہیں۔

قرارداد کے متن میں کہا گیا کہ اگر پاکستان کا پانی روکا گیا تو یہ جنگ شروع کرنے کے مترادف ہوگا، پاکستان ہر قسم کی دہشت گردی کی مذمت کرتا ہے۔